《教父冇限耆》完整剧情角色介绍 罗拔迪尼路79岁再对亲家
罗拔迪尼路（Robert De Niro）再演搞笑角色，今次在《教父冇限耆》（About My Father），因当过兵所以一直视自己为英雄，可惜呢个老窦其实都持续散发出阵阵𤓓味，仲要教极唔化。“教父”今次化身爆笑𤓓爸，一边教仔，一边反过嚟畀个仔调教！绝对系父亲节入场睇嘅之选。（上映日期︰6月15日）
廿四孝老豆沙宝（罗拔迪尼路 饰）一直将自己做人𠮶套，灌输俾阿仔斯巴顿（斯巴顿马尼卡高 饰），可惜“仔大仔世界，越大越变坏”！斯巴顿结识富二代女友后，嫌草根老豆太过失礼；但为咗求婚，被逼带住𤓓爸见未来亲家。斯巴顿为避免尴尬，决定落力调教老豆，点知沙宝依然失晒控：佢同超豪亲家唔止生活习惯撞到啪啪声，两父子仲搞出连串𤓓爆大镬！到底系爸爸太𤓓，抑或阿仔要求多多，呢场超疯癫见亲家之旅，究竟点收科？
罗拔迪尼路自认非有型老豆
贵为影帝的罗拔迪尼路向来戏路广泛，除了早年演出《教父》（The Godfather）、《的士司机》（Taxi Driver）的型格形象深入民心，近年专攻喜剧路线亦大获好评，像是《见习冇限耆》（The Intern）、《PARTY冇限耆》（Dirty Grandpa）等，均是幽默抵死之作。今次他在《教父冇限耆》加倍出位，再次炮制搞笑窝心。虽然幕前形象霸气十足，但“教父”却自认并非“有型老豆”：“我啲细路成日反驳我，不过佢哋识尊重我。”讲到为人老豆之道，他指最紧要对子女有爱，但有时也要有严谨的底线。已届79岁的他最近自爆再为人父，刚好遇上《教父冇限耆》上映，对他来说，相信是最佳的父亲节庆祝礼物！
启发自男主角真实父子情
电影故事启发自男主角兼编剧斯巴顿马尼卡高的个人经历，连“教父”罗拔迪尼路的角色也是借用了斯巴顿爸爸的真名，爆笑演绎矛盾又温情的父子情。斯巴顿大赞爸爸沙宝一直是自己头号粉丝，但也是批评最狠的一个，这种口硬心软的亲子互动，造就他创作《教父冇限耆》的灵感，道尽所有子女的心声。
罗拔迪尼路为今次《教父冇限耆》的演出准备十足，得知故事由斯巴顿和父亲沙宝的父子情改编，因此希望了解关于沙宝的一切。除了密密睇沙宝剪发的影片、模仿他的手法之外，还在拍摄《花月杀手》（Killers of the Flower Moon）期间，邀请沙宝到片场亲身会面，两人足足倾了六小时！甚至到《教父冇限耆》开拍后，两人仍然不断有联络，沙宝本人还亲临拍摄现场监督。罗拔迪尼路表示：“我很幸运，可以对住真人参考。”而沙宝则笑言准备随时“调教”影帝：“我系部戏嘅顾问，要监场确保他们唔会唱衰我！”
𤓓爆两仔爷 VS 上流亲家
沙宝（罗拔迪尼路 饰）
自认廿四孝老豆，但阿仔斯巴顿就觉得佢成日出丑。为人固执，斯巴顿都冇佢符；佢仲坚持要一齐见未来亲家，结果搞出唔少𤓓爆大头佛。但实情口硬心软，为咗阿仔乜都肯制！
斯巴顿（斯巴顿马尼卡高 饰）
细个当老豆沙宝系英雄，大个见识多咗，就觉得老豆𤓓爆。成年先嚟反叛嘅佢，为咗拎传家之宝戒指、向女友艾莉求婚，被逼带埋沙宝见未来外父外母，为免失礼，唯有临急“调教我爸爸”！
艾莉（赖丝莉碧 饰）
艺术家女友，生于有钱人家，自从斯巴顿同佢拍拖后，见识到完全唔同嘅世界。今次邀请沙宝同斯巴顿两父子去别墅渡假，希望两家人可以认识多啲。
老琥娜（甘嘉德露 饰）
霸气未来外母，全家佢最恶。身为有钱、有名、有地位嘅天之骄女，佢难以接受个女居然拣中个穷二代。今次见亲家既系开始接纳斯巴顿，亦系对佢两父子嘅考验！
威廉（大卫瑞奇David Rasche 饰）
世袭型富豪，家族经营酒店生意，为人随和又锡仔女，堪称“零死角爸爸”。一早当斯巴顿系半边仔，之不过同未来亲家沙宝完全唔夹，搞到场面超失控。
力奇（安德斯荷姆 饰）
父干型人生赢家，准备接手爸爸威廉嘅酒店集团，而家全职做贵宾陪玩专员。一直觉得斯巴顿只系低级蓝领仔，所以成日串爆对方。
德仔（毕迪尔Brett Dier 饰）
威廉嘅细仔，虽然心地善良，但有时言行同一般人格格不入，令人见到戥佢尴尬。为咗成为治疗师，苦练紧颂砵同冥想，脱俗到任何凡人都无法进入佢嘅境界。