电子灵．专访︱杨天宇深夜合埋眼撞鬼 李靖筠：钟意睇Hardcore嘢
香港灵异题材奇幻惊栗电影《电子灵》将于5月11日上映，电影由梁碧芝执导，Gladys李靖筠、Angus杨天宇、顾定轩、Jeana何珮瑜及龚慈恩等主演，讲述一位沉迷使用电话与社交媒体世界的少女网红陈楚童（李靖筠 饰），经历好友直播自杀事件后，一直深受困扰；期后亦因为透过直播节目开启“死者手机”而遇上电子灵，迫使她面对许多心灵的恐惧与愧疚，并与好友林子强（杨天宇 饰）一同闯关完成电子灵的残酷任务、寻找破解电子灵的方法。《电子灵》的男女主角李靖筠与杨天宇均首次参演灵异题材电影，早前接受《香港01》专访时，分享拍摄电影的点滴与过去的灵异经验，并希望观众能够从中得到反思。
首次主演灵异题材的电影，李靖筠分享到自己拍鬼片的意欲：“我冇特别想（参演鬼片），因为本身都惊睇鬼片。点解我惊鬼片呢，就系因为我惊鬼！我成日觉得做呢啲嘢或者睇鬼片，系好容易招惹到鬼嘅！”然而完成《电子灵》的拍摄后，Gladys的想法有所转变及成长：“但系Somehow（某程度上）拍咗呢次鬼片之后，系令自己冇咁惊鬼嘅，好似拆解晒中间啲过程，会见到我同只鬼一齐食饭嘅！Somehow都令我克服咗少少恐惧。”
为了令演技更能感染观众，Gladys为拍摄做足功课：“其实我做呢套戏之前系有特登睇鬼片嘅，因为我惊我冇咩点睇过会惊。然后我就拣咗最经典嘅《见鬼》，真系吓到我傻咗啦！我记得我自己一个喺电脑睇，我睇睇下由Full Screen（全屏幕）缩到去再远啲，后尾再顶唔顺，我就喺后尾垫住啲Jazz（爵士乐），我先觉得可以。”而导演梁碧芝亦在开镜前分享合适的参考例子，让Gladys的演出更得心应手：“导演冇介绍，但系有剪咗一啲片段出嚟，话畀我哋知佢钟意呢啲演法。”
至于男主角杨天宇，则对鬼片兴趣甚浓：“我系有少少自虐心态嘅，我系惊、但系又好想睇！好好奇，好钟意睇！睇鬼片永远系惊过演鬼片，因为所有机关、几时吓你，你系预先知道晒，同埋我个角色系超乎异常咁冷静，因为我有阴阳眼，系殡仪馆到做嘢，由细见到大，所以导演想我好似觉得系人嚟嘛！所以啲反应系差好远嘅。”至于营造惊栗效果上，Angus笑指：“所有都系灯光嘅气氛，加埋后期声效所有嘢（去营造）。”Gladys回忆起拍摄现场时，亦表示与画面甚具差异：“我哋好多系工厦里面嘅片段，我记得我行过个工厦，我话‘驶唔驶熄啲灯？好似好光㖞！’即系睇个Monitor（显示器）原来系好黑嘅，都有呢啲落差嘅。我要摸黑、但系又好光㖞，都几得意嘅！”
电影虽然有鬼片的外衣，但内里探讨中心思想，仍然围绕女主角的人际与家庭关系，李靖筠分享指：“我哋成套戏个重点其实唔喺鬼上面，对我嚟讲其实系一套温情片嚟，系用鬼去包装咗。”Angus亦从电影的英文名作进一步解释：“我哋英文嘅电影名叫Social Distancing，用灵异片去包装现今科技发达、个个人都攞住手机、人与人之间嘅关系。喺戏里面系有讲到Dating App（交友软件）、有啲人好沉迷P图（修图），P到自己喺网上世界系呢个样嘅时候，长远嚟讲对自身安全感或者自尊又会有咩影响呢？”
在拍摄技巧与后期制作外，《电子灵》的惊栗奇幻全靠演员透过反应演绎感染观众，深明此道的Gladys亦有做好准备：“呢套戏系要Prep（准备）反应嘅，讲真做文戏系唔驶Prep嘛，系去感受。但系呢套我有Prep定啲反应，因为有时剩系拍你一个反应，所以因为呢个原因我睇咗好几套鬼片。”她亦感谢工作人员在拍摄期间给予适当的辅助：“例如有一样嘢跌咗落地，咁我吓亲啦，但系做到5个take（镜头）、到第12个take就唔系真系吓亲，所以都有叫现场嘅工作人员帮我手，到我要（反应）嘅时候，就会大力拍门、或者拍手、尖叫，我就有反应。”Gladys更笑指自己有个小窍门，能够有助迅速进入恐惧与紧张的状态：“譬如Jeana要嚟揾我，我咁要好惊咁匿埋，好多时候现场气氛真系一啲都唔惊、同埋我好开心咁。你惊嘅时候会心跳加速、会喘气，但系未有嘅时候，我就会系咁喘气、令自己进入返状态。有类似嘅技巧可以帮到手，好似《深宵闪避球》嘅时候，埋位嘅时候场波系打到中间，要Warm up（热身）返令自己喺一个好紧张嘅感觉。”
剧情高潮部分，Gladys有一段相当惊人的“自残”桥段，需要面对一面镜、用针刺在脸颊之上，Gladys回忆起拍摄过程时，居然表现得相当雀跃：“我真系拎住枝针、戮落去，我冇戮穿啦当然，但系真系做紧呢个动作，我自己系好惊㗎！𠮶一场算系我比较钟意嘅场口，因为我钟意睇啲好Hardcore（极端）嘅嘢，我觉得𠮶场刺激啲，同埋我真系要牺牲一啲嘢，先可以生存落去，我好钟意呢个感觉！”相信Gladys的粉丝多少会为她感到心痛，亦担心有机会意外破相，但Gladys笑指：“𠮶枝针好钝嘅，但系我真系搣（块面）咁戮落去。同埋我真系戮落去，我先演到𠮶种痛！”而提到对Hardcore剧情的钟爱，形象活泼、乐天的Gladys，原来也有不为人知的“黑暗面”，她分享指：“我本身钟意肢解一类，但系就唔系好啱今次嘅戏路啦，希望下次有机会做啦！拉下肠、斩下脚咁样！”
《电子灵》的剧情中，女主角陈楚童因为开箱死者手机而招惹到“电子灵”，现实中李靖筠的体质对灵异世界的敏感度本来不甚高，却因为一次经历而解锁！Gladys分享指：“本身我系超唔敏感嘅！我之前仲要住喺殡仪馆隔篱我都未见过，但系有一次畀KB（Kelvin李健宏）捉咗去灵探之后，我就从此变咗敏感体质！真系Thanks to him（多得佢）！真系超级嬲！”她续指：“不过同KB去灵探，有啲感觉我系有过嘅，以前我会‘唉！谂多咗嘅啫！’但系𠮶次灵探系Confirm咗我有呢啲感觉嘅时候，就即系有（鬼）㖞！我觉得𠮶次嘅经验系将我某啲身体反应Link up（连结）咗。例如我而家闻到某一阵味、𠮶一只油嘅味，你系唔会唔记得嘛！”至于视觉上接触灵界，Gladys则表示十分难得，却未有相关经验：“好难见到㗎！见到你真系好彩呀！𠮶次灵探都只系见到个影啰，但系已经好惊喇！”
而提到对灵异世界的兴趣，李靖筠望向身边的杨天宇说：“不过睇佢个样劲正直，但系估唔到佢好钟意‘Wi Wung’嘢！”Angus随即笑指：“我唔算感敏体质，我读紧书𠮶阵时会比较敏感，去到某个地方有少少唔妥，我好容易毛管戙嘅，大个咗就少咗好多！可能阳气盛咗！”Gladys接续笑指：“但系佢好有兴趣㗎！一听到人哋讲佢就会讲埋一份！”Angus则表示：“我有时临瞓先钟意听鬼故，睇好多古灵精怪嘢，唔一定灵异嘅，外星人我都好钟意听！”
而Angus过去亦有过灵异的经验，虽然发生于年少时期，却令他印象甚深：“我都有过，𠮶时读书放暑期，好多时都凌晨一两点先瞓，睇完电视就会返房瞓。但系有一晚好奇怪，Feel到你睇电视但系侧边系有一个人望住你，成个感觉好唔舒服。咁我冇乜点理，照旧睇完电视、熄灯返房瞓。咁无啦啦三点钟想疴夜尿，咁后生仔好少嘛，咁去完厕所返嚟，一瞓落床，书台盏灯着咗！我未识惊，因为𠮶时好攰，一熄咗佢，我合埋眼就见到佢嘅形态！本身佢畀个后尾枕我睇，然后慢慢拧过嚟，一开始系人样，慢慢变成好核突嘅样。我次次擘大眼就见唔到，一合埋眼就见到！”杨天宇稍顿一顿，透露最后的结果：“佢同我玩到五点几，我佢讲‘我好攰喇，要瞓先’然后就攰到瞓着咗。”
Angus的经验亦令Gladys想起出游时每每会遇到疑似的灵异事件：“我每一次住酒店，我就会‘唉！我嚟喇，你哋唔好搞我啦！’又冇话吓到黐咗线嘅，我不嬲都信有呢样嘢嘛！心谂我系嚟做嘢咋，唔好搞我啦！”她更提到一次较深刻、似被“灵界大整蛊”的经验，Gladys分享指：“我零零碎碎都有一啲经历，有一次同个记者一齐去，住一间房。每一次我开水领头羊就冇水，好似坏咗，但系佢一开就有啰！唯独系我开就冇水！我好嬲、但系又超级惊！我喺厕所嘅时候，佢哋无端端话去买嘢，我即刻两分钟洗头冲身，要佢哋等埋我，我唔要一个人留喺房！𠮶次真系好惊！”
鸣谢
场地提供：@keeprollin_studio
李靖筠
发型：Cooney Lai @hairby_cooney
化妆：Kineks Ho @ki.neks_ho
服装：@sandroparis @purplepr
杨天宇
化妆：@mikowongms
发型：Karol Ng @myos.hair
服装：@harveynicholsmen