12日︱邓丽欣大方分享爱情观　承认欠粉丝演唱会︰会还畀佢哋

香港爱情电影《12日》，由《12夜》导演林爱华执导，邓丽欣及马志威主演，电影已于4月27日正式上映。今日（29日），林爱华携同邓丽欣、马志威一同出席电影宣传活动，与观众见面，更即场与观众分享二人的爱情观及演出电影的点滴。

邓丽欣与马志威于活动上对谈时，被问到爱情应该一见钟情抑或培养，马志威表示：“我觉得系可以慢慢随住时间去滋长。”而邓丽欣则分享指：“我觉得爱情系应该一见钟情㗎㖞！边有得培养㗎？识咗一个人冇耐其实就会知道会唔会同佢一齐到！”

邓丽欣与马志威在宣传活动上接受访问时，分享到电影剧情跨越多个年纪与人生阶段，演绎难度甚高，Stephy表示：“外型上又跨度、演绎上又跨度、情绪上嘅跨度都好大！其实对我嚟讲我觉得情绪上难啲，由女生嘅角度，由好相信爱情到后尾有失望、到不相信、跌落咗个深渊里面，呢种情绪慢慢谷落去其实几辛苦嘅。”

马志威亦表示：“究竟可以点样说服到别人，呢个系18岁嘅我、呢个系30岁嘅我，呢样系难度。”他续指自己对其中一场戏尤其深刻：“有一场闹交嘅戏，两三页纸其实系得我不停闹Stephy，又要氹、中间又要闹，𠮶场戏好深刻因为用咗好多Energy。”他指自己性格较平和理性、甚少争执，所以在演绎上具有一定难度。

邓丽欣早年曾参演一系列叶念琛爱情电影，成为当时极为流行的作品，事隔十多年Stephy演出的爱情电影不论题材及角色深度亦有所转变，她表示与林爱华导演合作的成果非常不一样：“我自己嘅年龄同经历好唔同啦，演绎上都唔同。第二我觉得男导演同女导演都好唔同，佢哋想讲嘅嘢、表达嘅角度，或者现场处理事情嘅方法都好唔同，所以好影响我点演绎。我其实都系将导演想讲嘅嘢讲出嚟，我觉得同女导演合作有另一种模式，我觉得几好玩。”

拍摄爱情题材的电影，亦于台上大方分享自己对爱情的观念，Stpehy表示未感压力：“预咗㗎！有心理准备！同埋我都几有经验㗎喇，对于回答呢啲问题，有晒准备点答。不过对于我自己嚟讲，好多时我都唔介意分享，当然我都想保持返自己啲啲嘅私隐啦！但系尽量有啲咩，到而家呢个年代，冇咩嘢需要太隐瞒，同大家开心Share我哋嘅想法，我觉得冇乜问题。”Stephy亦表示电影《12日》虽然结局较灰暗，但亦不会令自己对爱情失去期许：“我觉得电影还电影，角色还角色，会影响我嘅情绪，但系本质上嘅自己，想法唔系咁容易可以改变到嘅，自己有自己嘅原则嘛！”

今日适逢全港戏院日，《12日》许多场次亦爆满“满场红”，Stephy表示会趁机会入场谢票多谢观众，谢票的时间表已排到晚上。而作为“票房福利始祖”，Stephy笑指：“唔好喇！我觉得上次开得太大喇个头！所以今次到咗先啦！希望排片排得好啦，可以多啲人睇到我哋部戏，票房就到1000万再问我啦！砸住数先！”亦预告若票房突破千万，将会再举行与观众见面的大型活动。

在《12日》宣传活动期间，不少Stephy的粉丝都表达对演唱会的期待，Stephy认真地表示：“会有呢个计划喺我嘅Schedule里面，至于排到几时就未有确实嘅日子啰！相信会有呢一日畀佢哋嘅，还畀佢哋！”她亦表示一直以来都有储歌唱作品，包括不同的唱片与电影主题曲，而新歌作品将要视乎缘份。