金像奖｜尔冬升回应《十九岁》得奖：投票人有智慧去面对呢件事
《第四十一届香港电影金像奖》昨晚（16日）举行，早前因陷多项争议而腰斩上映的《给十九岁的我》，最终拿下大奖最佳电影，又再引起网民批评。身为香港电影金像奖协会主席的尔冬陛，于后台接受媒体访问时，再一次详细解释投票机制，以及《给十九岁的我》得奖的原因，强调坚持让这部电影入围是14个董事的一致决定，亦证实到系投票人嘅意愿：“，因为第二轮嘅投票人，我觉得佢哋有智慧去面对呢件事，即系将呢个权交俾佢哋”。
尔冬升表示：“《给十九岁的我》攞〈最佳电影〉大会无睇法，董事局强调我哋系为电影圈服务嘅机构嚟，我哋对每年香港电影，拍几多部、拍乜题材、点样发行、完全唔关我哋事，佢只要拍咗出嚟，按照规则，我哋提供服务，佢如果攞到票数就可以入围，第二轮选咗之后，佢攞到票佢就赢，有赢有输，个游戏每年19个奖，每个奖入面都有百分之八十嘅唔开心，所以如果我哋咁睇会觉得好残忍，我觉得佢系一个业内嘅奖嚟，我觉得所有被提名嘅，应该系𠮶个月尽情去享受，因为无人知道结果系点样，至于你讲《给十九岁的我》𠮶到，之前我都同媒体讲过㗎喇，仲需要强调多一次咩？”
“近期我都有喺网到睇，有啲年青人或者网民啲反应，成日话‘呢个电影圈系一个小圈子呀’，佢系41年举办咗，咁要睇你用乜角度睇佢喇？佢系一个工业奖嚟㗎，到而家有二千个投票人，咁系唔系小圈子，要你以咩角度去睇佢哋，咁我亦讲过话，经过呢件事其实佢系有啲纷争，但无端端金像奖系被卷入嘅，我哋喺呢件事，从来未试过处理咁耐嘅时间，直至系一个礼拜之前，其实版权方愿意俾啲片俾我哋，但其实已经过咗censor（审查）嘅时间，咁当然我哋都觉得，如果校方都已经系觉得要退出嘅话，大家睇到今日有三位女仔（《给十九岁的我》戏内女学生）都有嚟到，最后尾都系censor改唔到，我哋就维持做法，系无片咁播出嚟啰。”
“结果好明显㗎，我讲过我哋有超过一千位投票人，另外有75位专业评审，专业评审系每个界别，有个评选事务小组，按照佢哋嘅投票率，佢哋以前嘅地位呀，经验呀等等，而每年去选呢75位评审，有5位喺海外地区，呢75位评审占百分之五十五嘅分数，其他𠮶千几人系占百分之四十五嘅分数，实则嘅投票率我唔清楚，会计师未话我听，我事后会知道。”
“我哋当初董事局嘅决定，佢（《给十九岁的我》）已经做咗二千场嘅情况之下，我哋有咁多人投咗票，我哋亦唔可以仲裁呢件事、去查呢件事，我哋冇呢个权力，咁既然入咗围，咁当时喺社会上出现咁大件事𠮶阵，我哋好详细考虑过，就唔去取消佢被提名嘅资格，佢入咗围喇已经，因为第二轮嘅投票人，我觉得佢哋有智慧去面对呢件事，即系将呢个权交俾佢哋。”
“我哋14个董事，一致唔认为我哋要行驶呢个权力，所有啲会章都会讲话‘董事局会保留一切权力去做乜’我哋觉得⋯⋯喺现有⋯⋯呢件事嘅情况下，我哋唔会去取消任何被提名嘅资格，同埋去取消佢去继续比赛，呢个系我哋嘅决定。”
“好多人纷争就系话，‘乜你哋金像奖咁恶㗎？我想退出都唔得㗎？’喺41年整个发展过程，最早系《电影双周刊》举办嘅呢个奖（金像奖），后期我哋系参考工业奖，我哋参考Oscars，Oscars而家有9500人投票，佢系一个工业奖嚟嘅，唔系康城、柏林𠮶啲评委奖嚟嘅，咁⋯⋯我都唔知点讲，因为成件事非常复杂，我原本系做一个专访去⋯⋯最主要系俾行业嘅行家知道，因为由第一日开始，我已经知呢件事系唔会有一个方法令大家都会认同，所以呢个决定，而家出到嚟，我谂呢个结果，证实到系投票人嘅意愿，咁你哋问我有咩立场？我作为喺个会𠮶度，我无立场，结果已经系到喇，所有结果都唔系我地可以左右，任何一个奖。”