白日青春︱黄秋生大爆父亲生前荒诞史 “70岁再婚大佬嬲咗一年”
香港电影《白日青春》由马来西亚籍导演刘国瑞首执导筒，并由三料金像影帝黄秋生伙拍周国贤、新晋巴籍演员林诺主演，电影将于3月30日正式上映。《白日青春》讲述的士司机陈白日（黄秋生 饰），与儿子陈康（周国贤 饰）关系甚差，然而陈白日在一次交通意外后，因为歉疚而在莫青春（林诺 饰）被受追捕下出手营救，一老一嫩展开了一趟奇特的逃亡旅程，产生一种难以言喻的父子关系。
主演《白日青春》的黄秋生与周国贤接受《香港01》专访，分享电影的角色与现实生活同为父亲的经历。当中，家庭背景曲折而传奇的黄秋生，更分享不少童年与父亲的点滴，以及在父亲缺席下成长，对自己作为父亲的影响。
影帝读剧本的第一眼
从影近四十年，黄秋生演员生涯历经多个阶段、在无数港产片中饰演令人印象深刻的角色，演技经学院及数十年制作的磨练，成为今日观众熟悉的三料金像与金马影帝。在《白日青春》与首执导筒的刘国瑞合作，黄秋生接受专访时，分享到首次阅读剧本时的反应：“第一次收到剧本之后叫佢改剧本啦！改返啲逻辑。（周：大改？）有啲唔啱逻辑就叫佢改，如果唔系好乞人憎㗎成单嘢！第二次见面嘅时候，再睇就顺咗好多，仍然有啲细致嘢就到现场再搞。”
黄秋生自言每次读剧本均非常著重戏剧逻辑：“我成日讲话‘跛佬追巴士’嘛，你跛㗎大佬！点会无端端追到架巴士啫！‘因为个女主角喺架巴士上面啰！’哦！咁上到去呢？咪跛返啰！”秋生更笑指虽然现实世界不乏荒谬之事，但港产片的世界亦不相伯仲，他比喻指：“张曼玉点会钟意王晶呢？因为王晶系男主角、张曼玉系女主角啰！哦！”为此表示无奈。黄秋生虽然会就剧本逻辑提出个人意见，然而亦会尊重原创者的想法：“顺返导演个思路去做，令到佢合理化、冇咁癫，有时我作为观众一睇，有啲嘢会批判，都唔啱嘅！都唔系咁嘅！”
黄秋生缺席的父亲
《白日青春》分别以血缘及关系两种对父子的观念切入，以陈白日与亲儿陈康、莫青春两段父子情作为对照，探讨亲子情的错综复杂。饰演陈白日的黄秋生，原生家庭背景复杂，自己作为父亲亦未如理想。黄秋生自言成长背景为自己作为父亲的身份，带来相当深远的影响：“我都冇见过我老窦乜滞。作为父亲，我又冇见过我啲仔乜滞。成日做嘢走咗去，跟住又分开住。”他表示父子之间的分隔并非出于默契，而是生活方式差异下的牺牲、亦因为作为演员的特性令他只能二择其一。
黄秋生的大半生里，父亲一直缺席。对他而言，虽然未如《白日青春》中陈康一角，一直活于父亲的阴影之下，但亦因此不懂得如何当一位父亲。秋生表示：“咁我冇Father Figure（父亲形象角色）嘛！我都唔知点做一个老窦，就算我老窦喺到我都未必识做一个老窦啦！我老窦都系一个小朋友嚟啫！我听我大佬、家姐讲返我老窦啲嘢，唔怪得知我系咁啦！”
寻亲后得知的父亲荒诞史
自小与父亲分隔，黄秋生年前因为接受外媒访问而意外寻回同父异母的兄姊，然而当时父亲早已离世，缘悭一面。黄秋生提及到澳大利亚与兄姊见面，笑指：“自从上一次我去澳大利亚想拜下佢之后，我发觉我哋啲命运都系荒诞剧嚟嘅！本来谂住好悲情嘛，着晒黑西装、攞住紥花，同个大佬走去个坟墓到跪低摆紥花。（兄长）一路都唔出声，到我走喇，就叫我去个后栏𠮶到‘你唔系想拜下老窦咩？就喺个花槽到喇！’我话花槽边到呀？（兄长说）‘唔知呀！好似呢到、好似𠮶到’我话啲花枯晒嘅？佢话‘系呀！系呀！春天嘅时候好靓㗎！你喺到同佢倾下计啦！’咁我咪倾下计啰！”
论到家族故事的荒诞之处，黄秋生提到在兄姊转述下、有关父亲的往事，表示父亲在妻子生前已被怀疑出轨，而线索竟为父亲在外放狗长达三小时！在妻子身故后，秋生指父亲的荒诞事仍然未有终结：“七十几岁走去结婚㖞！仲要唔同我大佬讲，喺间Club入面见到嘅时候话‘我上个礼拜结咗婚喇！’我大佬嬲咗佢一年！佢系同个唔知咩阿婆结婚，几Romantic啊！无端端结咗婚，仲要死喺人哋屋企㖞！真系黐线！”而秋生亦笑指听到父亲的荒诞史后，也难怪自己遗传十足。
黄秋生与父亲的回忆
寻亲后无缘再与父亲相见，黄秋生表示对父亲的印象维持在童年阶段，大约到三四岁的时候。对于童年时与父亲相处的点滴，秋生提及一件印证自己遗传了父亲火爆性情的往事：“我细个攞枝机关枪劈佢㗎！佢打我一巴，我攞枝玩具机关枪兜头‘办’佢！”秋生将事件娓娓道来：“当时屋企只猫叫春，成家走咗去睇，围住你眼望我眼。我老窦返咗嚟，我行想埋去（抚摸家猫），我老窦拉住我唔畀，跟住我揈开佢、喺咁多人面前，行埋去摸只猫，返埋去佢就兜巴星我！跟住我就喊，喺张床仔到喊，佢走埋嚟氹我、又摸我个头。一摸我个头、我身边有枝机关枪，就‘办’佢、佢攞个咕𠱸挡住。”而秋生亦忆述母亲曾表示，父亲认为童年时的黄秋生已遗传到自己的脾性。
周国贤：做一样父亲做不到的事
在戏中饰演黄秋生的儿子，陈康一角讨厌父亲的不负责任，亦因为对父亲的爱恨情结，而刻意塑造自己成为一个相反的人。周国贤表示父子关系对他而言，与其他亲子关系不同：“（父子之间）好似好多嘢好想讲，但系又唔敢讲。唔止系我同我嘅老窦，好多亚洲社会嘅父子（也一样），父女、母子冇嘢㗎，父子硬系成日面对面，唔知讲乜好。好似好多嘢想讲，但系讲出嚟就好肉酸嘅。”
现实中，周国贤与父亲的经历亦与戏剧有相似之处，作为音乐创作人的周国贤表示：“（父亲）细个同我讲过，佢想夹Band，喺鸭寮街买咗枝二手电结他，插咗入扩音器到触电咗一次，佢就决定唔夹！之后我就听好多Band（乐队）嘅音乐，就想弹结他。当时喺纽西兰，佢就做‘太空人’，揼低我哋几个月唔理、又返嚟咁，可能我就谂：等我做一样你细个做唔到嘅嘢！就系𠮶个时候，我就想夹Band啰！”而周国贤的第一支乐队就因此在纽西兰生活之时成立。他续指：“十四五岁个个都反叛嘅！等于做啲嘢令到阿爸阿妈担心，𠮶个年代觉得夹Band就系学坏，食烟、饮酒、沟女咁嘅！我就系想令到佢哋担心！”
两位父亲的对谈
黄秋生与周国贤现实中均为父亲，无独有偶黄秋生育有三子、周国贤则育有三女，两位父亲提到与下一代的关系，想法异同之处相当有趣。周国贤的三位女儿年纪尚幼，他向秋生分享作为三女之父的感受：“佢哋去到几大，都会锡佢哋嘛！锡佢哋面珠墩咁，但系仔就唔会嘛！如果有个仔、佢有须根嘅，佢锡你又好似好……”黄秋生随即笑指：“我反而觉得女大咗就唔锡得㖞！个女大到咁上下就唔可以咁嘛！仔大到几多岁都可以锡！”周国贤亦笑称：“我对上一次锡我老窦系……唔知几时㖞！有一次饮醉咗，同佢倾计，锡一锡佢个头啰。”黄秋生带笑回应指：“仔锡阿妈就可以啰！但系老窦锡女嘅话……女大到咁上下，就交畀第二个锡嘛！”周国贤借机会开玩笑：“锡埋佢条仔啰！”黄秋生马上高呼：“得鬼闲锡埋佢条仔呀！唔揼佢已经（畀面），好彩冇生女啫！”
黄秋生近年虽然一直与三子分隔多地居住，但仍不时前往相聚，更会身体力行“锡个仔一啖”，他笑指：“啱啱先锡完咋！夹住佢个头、锡落去！你四十岁我都当你系细路㗎！你永远同我嘅距离都系一样。”
黄秋生：
发型: Taky Chung @ AdmiX HairStyling
化妆 : Jenny Ng
周国贤：
化妆: @vinciwinkidotcom @vinciwinki.winki
发型: @evechiuhair @w.work.shop
服装: Issey Miyaki
Special Thanks @felixchan5