《武替道》伍允龙初入行被欺负　获董玮挺身而出︰我好尊重嘅大师

香港武打动作电影《武替道》，是第七届首部剧情片电影计划专业组优胜作品，由新晋导演梁冠尧、梁冠舜兄弟共同执导，刘俊谦、蔡思韵、董玮、伍允龙、林耀声、梁雍婷等主演。《武替道》今日（4日）举行电影开镜礼，导演携同一众演员出席，祈求拍摄顺利、票房大好。

罕有地在香港现身的伍允龙，于《武替道》开镜礼上现身，并接受《香港01》访问，他分享回港后便能够与董玮师傅合作的喜悦：“其实我都做紧武术指导嘅工作，啱啱早几日返嚟（香港）。开心嘅！每次有机会拍戏都开心嘅。今次最开心就系可以同董师傅（董玮）合作，我识咗佢好多年，佢帮过我好多、教咗我好多嘢。今次系首次同佢一齐演同一部电影，之前最多都系佢做动作指导、我做演员，我觉得好荣幸。”

伍允龙不但首次与董玮师傅共同演出电影，亦提及初入行时董玮师傅对自己的恩情：“董师傅系一个好有义气、喺行内好有正义感嘅人。记得初入行时拍一部戏，有少少被制作组‘恰’，董师傅见到不顾一切帮我出声︰‘喂！唔可以咁对伍允龙！新人嚟㗎！’，我当时谂我系个Nobody，佢点解要Defend（捍卫）我呢？我好开心有个前辈嚟撑我，愈做呢行愈耐，就发现呢种情况好难得。好少人会咁样Risk（赌上）自己嘅Reputation（名声）去Defend你，董师傅廿年前系咁、而家都系咁，所以董师傅系我行内好尊重嘅一个大师。”

《武替道》由梁冠尧、梁冠舜兄弟执导，二人原来与伍允龙渊源甚深：“其实两位导演嘅爸爸，同我爸爸系蔡李佛嘅师兄弟。佢哋两个（导演兄弟）做武师呢都帮我好多次，喺我做指导嘅时候，呢两位我系好欣赏佢哋嘅。同埋佢哋都系Performer（演员），都识去演戏，又识拍嘢，咁佢哋一OK喇，就话有个角色想揾得做，咁梗系冇问题啦！第一，我好想帮下朋友！第二，就系我觉得呢个剧本好好。”

伍允龙近年在在世界各地电影担任动作指导，然而他对香港动作电影的精神犹其重视：“最紧要嘅系佢讲紧香港电影嘅精神，咁我周围都拍过，喺荷里活又拍过、喺全世界边到都拍过，我觉得香港有一种精神系罕有嘅，就系无论个Budget（预算）未必够、或者有啲Shortcoming（不足）都好，成个现场所有人都会努力去做好件事。”

提到《武替道》的剧本故事，伍允龙犹其感受良多：“呢套戏系讲啲武行、武师嘅辛苦，咁其实我入行𠮶时都系武师出身嘅，慢慢转做指导同演员，咁我自己都好清楚武师嘅辛苦同困难。”伍允龙分享作为武师或替身，能够在电影里看到自己的表现，满足感非常大：“我初初入行𠮶时我系做Double（替身）嘅，我最Fit𠮶时我系替人哋嘅，咁而家感谢主有机会自己演返啦，不过我都明白每一个武师嘅心态啰。有时我听返啲前辈讲，可能佢哋喺部戏里面唔系主角，不过喺部戏里面佢哋做咗个好靓嘅动作，佢哋会入戏院睇，佢会记住‘呢个动作系我嚟嘅’呢个咁高难度嘅Stunt（特技动作）系我嚟嘅。”

作为习武之人与演员，伍允龙将两项专业结合，并得出他的人生哲学︰“我嘅Philosophy（哲学）就系‘Pain is Temporary，Film is Forever’（痛苦只是短暂，电影却是永恒），即系你受伤、断手断脚都系会好返嘅，不过你拍出嚟嘅嘢系永远嘅，所以我就觉得无论套戏系大与小，都会尽晒力去做，因为系留紧一个Record（纪录）系畀未来嘅。”而伍允龙最后认真地表示：“要记住一样嘢，功夫片、动作片嘅发源地系香港，我哋就要争气。”