《猛鬼3宝》郭奕芯被淫鬼上身　为著性感内衣减磅︰都几大胆

电影《猛鬼3宝》，结集三个都市猛鬼故事，其中由苏致豪及郭奕芯主演的一节，讲苏致豪饰演的的士司机，约女友郭奕芯去Party Room 爆房，结果引来淫鬼缠身，不能自拔。芯姐在戏中更要为呢场戏，刻意减磅穿上性感内衣。

苏致豪在戏中是的士司机，女友郭奕芯一直想去5星级酒店Staycation，但因为太贵唔舍得，改去工厦Party Room，芯姐上到房劲嬲，闹分手，就在同一时间，有淫鬼上芯姐身，态度180度转变，跟豪哥顿时变得小鸟依人，仲一齐翻云覆雨大战300个回合。

讲番呢场戏，芯姐变鬼后，要色诱苏致豪，要穿上性感内衣上阵，不过呢样都唔系最难，最难到芯姐的是要跳舞。郭奕芯︰“我完全唔识跳舞，而导演就正正要求我做到唔识跳，但又为男友尽力去跳的感觉。因为要著性感内衣，所以积极减磅，但时间不够惊出嚟效果唔够好。”

至于同豪哥的大战场面，芯都大赞对手豪哥专业，但全场戏就误中他的死穴。“佢好怕痕，记得有场戏我要坐佢上面，整个人俯身扫过他的肚再到耳仔讲嘢，可能我啲头发扫到佢身体，佢猛嗌话好痕，甚至我跟他亲密贴住时，呼出来啖气佢都觉得好痕。”芯姐拍完呢场戏，自觉都几大胆，“又要分饰两个角色，都几唔系我，幸好导演跟我讲得好清楚，演得轻松。”