假冒女团．专访︱李静仪Heidi赞Anson Lo勤力：最忙时都冇佢咁癫

Super Girls成员李静仪（Heidi）早前在新戏《假冒女团》中与MIRROR成员Anson Lo（卢瀚霆）、《全民造星III》十强李炘颐（Alina）、苏皓儿（Chloe）和新人陈紫萱合作，电影亦于今日（25/11）正式在各大院线上映。谈到拍摄点滴，Heidi接受《香港01》专访时坦言过程非常开心：“入剧组时我特登减咗几磅到107磅左右咁入去，但我系肥住出嚟，因为监制、导演好邪恶，成日都买劲多嘢食，成日‘万岁’，又炸髀又鸡翼又糖水又珍珠奶茶，边有可能唔肥！（你唔系演女团咩？唔系要Fit咩？）系呀，又要露腰又盛，唉！（咪挤晒啲肉出嚟？）少少啦！”

点击下图观看Heidi做Gym英姿：

Heidi又大爆主角Anson Lo面对美食不为所动：“因为佢喺套戏都有性感演出，所以逢亲呢啲场口，佢出场前都会做Push-up、Sit-up。（点睇呢位后辈？）佢真系好勤力，亦戥佢辛苦，但我哋成日都同佢讲，‘红嘅代价就系咁，就系冇得瞓觉，你想唔想红？’”她又指Anson Lo当时除了拍戏，还要拍MV，试过连续几十个钟头零睡眠：“我最忙𠮶时都冇咁癫，就算Super Girls工作加自己工作同拍剧，每日都仲可以瞓两三个钟，系讲瞓落张床度，而佢系只可以车上偷时间休息。”

话咁快Heidi已经踏入“29+1”兼入行九年，她笑指虽然Anson Lo经常叫她“前辈”，但仍然觉得自己好像入行不久：“感慨总有少少，‘我嘅青春咁就冇咗喇’，但其实我都好钟意自己呢个阶段，女仔唔同阶段都有唔同嘅靓，以前就Baby Fit好可爱，而家就开始系轻熟女，多咗份沉淀，各有各好，最紧要就系享受当下。”Super Girls现正处于“单飞不解散”的状态，Heidi坦言拍摄过程亦令她回想起休团前的时光：“正式开戏之前要排舞，又要上功夫堂，仲要录主题曲，所有嘢都系以前女团经历过。（习惯咗单飞？）开头唔习惯嘅，而家都两年喇，最惊𠮶次都系年几前出咗首广告歌，要做访问、行台，自己一个就有啲怯，因为习惯咗四个喺身边傍住，以往就算紧张都系五个一齐紧张。”

Super Girls休团已经有一段颇长的时间，到底是否有机会重组，Heidi便指大家要再期待多一阵：“女仔去到呢个年纪，一定会觉得有目标未达成，大家就会去追寻。（你追寻紧咩？）我好Enjoy做舞台，我都好钟意跳舞，但我亦都有个演员梦，想接触多啲、发掘多啲自己唔同嘅面孔，我知演员呢条路系好难行，比起做组合更加难，所以有行内人睇咗套戏，觉得我做得唔错，我知道咗真系感动到想喊。”

讲起Heidi在Super Girls时期的“代表作”，不得不提那一张来自《镁光灯下》MV花絮的经典GIF图，她坦言一班粉丝时至今日仍然会在粉丝群分享这个GIF图：“一齐笑下啰，唔通因为大家取笑我身材，我就要去隆胸咩！呢啲系屋企人畀我嘅嘢嚟，最紧要系未来老公唔介意就得，又唔系要畀大家睇！”她又笑住澄清自己的身材未似画面般有“视觉效果”：“𠮶次系要箍实晒，件衫系泳衣质地，又惊走光所以用乳贴，我未去到咁Worse嘅！同埋我一直都唔系标榜好身材，所以一直冇特别去澄清，着衫好睇、够用咪得啰。”她又笑称有一次非常无聊地P图将自己上围增大：“结果系我唔衬我，但讲明先，我自己都好钟意睇身材好嘅女仔嘅。”

化妆：Melody Chiu
服装：Adidas
场地：Fit Fat Club