黄秋生幼子回港自己冇埞企　回应长子非模特儿：边轮到你“摸”呀

香港宗教议题剧情电影《不赦之罪》，今日（3日）举行首映礼，新晋导演林善、谭善扬携同影帝黄秋生、剧后苏玉华、George欧镇灏、陈书昕及陈紫萱等一众主演一同出席。《不赦之罪》为香港电影工作者总会“总会拍电影”计划第一部面世上映作品，黄秋生于首映礼上分享时，亦提到总会会长古天乐主动邀请自己主演，并乐意与影坛新一代导演合作。

黄秋生于首映礼后接受传媒访问，谈到接拍《不赦之罪》的契机：“两年前古天乐揾我帮帮手，我睇完剧本话返去改改先啦，改完之后一年又返嚟，我以为冇㗎喇，改咗啲都拍得嘅。讲起揾咩脚，揾苏玉华好呀！然后咪开工拍啰！”他表示剧本琢磨多时，笑言：“先后改咗好多次，唔记得喇。系大槪话畀佢听太贪心喇，今日死老窦、听日死老母、后日死老窦、大后日又死老母，咁样唔得嘅！返返去讲重点，太过贪心嘅就cut咗佢，一部戏得90分钟，讲唔到咁多嘅！”

《不赦之罪》为George欧镇灏首部参演的电影，早前为了宣传更在街头孭上十字架，场面吸引大量途人围观，黄秋生笑言佩服但不会效法参与：“好佩服佢呀！（下次一齐？）梗系唔会啦，如果唔系点佩服佢啫！应该班后生做啦，我后生都做唔少呢啲丑怪嘢，尖沙咀扮‘嚤啰差’、油黑块面，都唔知做乜！（谁的主意？）岑建勋啩！”至于上映后的谢票活动，秋生则表示会尽量参与：“依家拍部戏好似结婚咁、一世人一次，咪做好佢啰！本来想唔摆酒㗎嘛，但变咗一世人一次，咪摆下酒啰！”

黄秋生于《不赦之罪》里饰演牧师，电影亦探讨不少宗教议题，本身作为基督徒的黄秋生，却表示难以认同戏中角色的价值观：“我绝对唔认同里面个价值观，要拍就要拍，点认同得到啫？认同唔到㗎嘛，你觉得自己系耶稣呀？有啲嘢你做唔到㗎嘛！”近日欧镇灏于社交媒体上以角色阿乐作为分身与网民互动，黄秋生表示不能扮成牧师：“痴线啦告解！假牧师？你叫我做假牧师，准备昆人双修呀？”续指：“我已经吸够负能量喇，呢世人都唔再吸呢啲嘢，唔好搞我呀大佬！”

香港电影业去年起陷入冰河期，情况亦蔓延至戏院业，日前历史悠久的海运戏院结业，黄秋生亦表示昔日留有不少回忆：“以前成日喺𠮶到做首映㗎，好多但唔记得喇！（拍拖去过？）应该有啩，但有都好耐喇！（感到可惜？）一个年代嘅过去冇得话可惜㗎嘛！”他续指：“我觉得每个年代都会过去，所谓‘飘风不终朝，骤雨不终日’，梗会有艳阳天出嚟嘅！等下啦，问题系你条命够唔够长、等唔等到嘅啫！”至于港产冰河的艳阳天，他则笑言：“有排都唔会到呀！依家个问题都唔剩系香港，全世界都系咁，好似撞鬼咁样，无端端明明《白雪公主》、变咗‘黑雪公主’！呢个唔关肤色事，系讲明‘白雪’㗎嘛！讲明灰熊嘅、你揾只白色嘅嚟，你色盲呀？”

黄秋生主演的舞台剧《螳螂捕蝉》早前完满落幕，秋生提到演出期间有一晚突然病倒，情况令他非常担心：“有一晚感冒，好惊呀好惊呀！突然间流晒鼻水，我心谂要塞住个鼻哥瞓觉，如果听朝仲系咁、流住两行鼻水喺台上面做呀？好大镬㗎㖞！好彩又ok，食晒维他命C！”舞台剧在香港获得观众广泛支持，谈到举行世界巡演时，黄秋生表示：“倾下先啦，因为牵涉好多嘢，话走就走、你估旅行咩！最有可能系英国、温哥华或者多伦多！（拣香港人聚居地？）梗系啦，唔通做畀意大利人睇咩！”

近日黄秋生幼子回港同住，黄秋生直言高兴，却同时抱怨自己在家中冇埞企：“有一个仔返咗嚟，好开心呀！两仔爷冇嘢搞呀，佢霸咗我个位睇电视、又霸咗我个位食饭，我本来饮下茶、睇下书，佢霸咗我个位，我冇得饮茶！”早前黄秋生亦分享长子黄一一的几张有型造型照，他表示：“𠮶个系大仔，啲相佢自己影！大𠮶个好识影相、扮嘢呀，好叻㗎！（似足你？）佢叻过我！”至于长子回港发展甚至加入娱乐圈的机会，他表示：“返嚟发展就唔会喇，喺𠮶边有嘢做，有屋有剩！（做模特儿？）唔系做Model，佢做经理啫，喺𠮶边做Model，边到轮到你‘摸’呀！大把人‘摸’啦！”