风林火山｜麦浚龙制作八年终康城上映：为孕育有棱角作品值得辛苦

香港犯罪动作电影《风林火山》由麦浚龙监制、导演、编剧并担任美术总监，金城武、梁家辉、刘青云、古天乐及高圆圆主演，电影即将于康城影展举行世界首映。《风林火山》世界首映前，于香港举行剧照及雕塑展览，展出一系列从未曝光剧照及西班牙雕塑家Eudald de Juana Gorriz制作的主角雕像，导演Juno今日（10日）亦特意在出发前往康城前现身，分享《风林火山》制作点滴及接受传媒访问。

在《风林火山》于康城影展世界首映前举行展览，麦浚龙表示早已计划举办雕塑展，笑言难以选出最为钟情的展品：“电影本身当然已经系一种艺术形式，但我成日觉得可以有更多艺术呈现、媒介去展示，哪怕观众暂时未睇到部戏，都可以从剧照、雕塑去感受到呢部戏。”能够带第二部执导作品到康城参展，Juno亦分享到当中喜悦与负担：“当然好开心，同时背负好多人嘅努力同期待。首先系制作团队，因为历时好长，某几个合作单位都过咗身，所以都好希望所有荣耀可以同喺天上面嘅人分享！”麦浚龙亦未有透露能够于康城影展进行首映，是否由影坛前辈出面促成，但感谢一众评审：“我谂要多谢评审啦，因为每一年嘅评审都唔同，收到入围康城呢一个消息对我嘅团队嚟讲都系好大嘅鼓舞！”

《风林火山》男主角之一古天乐早前透露将会出席康城影展，麦浚龙表示目前只知道首映日期，并正在忙于处理音轨：“其实我连自己喺康城展出地点都未知道，所以反而未问发行商有边个出席，都浪漫嘅！咪去到先知道啰！”至于另一半戴庚玲会否一同出席，Juno表示：“今次团队都多人一齐去，但呢一刻都谂咗做嘢先！因为未知道成个期表，每一日都加紧唔同嘅访问同活动，量力而为啦。”

《风林火山》主演金城武多年来甚少身处香港，麦浚龙表示未有就《风林火山》的动向联络金城武：“关于康城旅程我冇向演员联络，因为我几日前先喺泰国返嚟。都系以电影行先，所有台前幕后能够出席到嘅话，我都好荣幸！”麦浚龙于访谈节目预告中透露与金城武首次见面时无法找到地点，他笑言：“系有𠮶个地方嘅，只不过𠮶个地方唔系喺地面啫！一路揾𠮶个门牌都揾唔到，原来喺地底！呢部戏揾每一个演员都系好独特同好个别嘅沟通模式。”

对于《风林火山》剧情，麦浚龙笑言不少演员均有一个疑问：“我最记得写好个剧本、揾唔同演员，佢哋咁多个之间沟通过，但都有一个共通点，收到《风林火山》嘅剧本都不约而同地问系咪《僵尸》嘅续集！当时要拍《僵尸》嘅续集其实相对系易好多，但喺灵幻题材上其实我想拍嘅已经喺《僵尸》入面拍晒，所以写过一个同灵幻、神怪无关嘅新剧本。”麦浚龙更透露落笔写《风林火山》一刻，原来全因失眠所致：“我记得落笔写第一场戏，系我带住《僵尸》去威尼斯影展，因为出席紧接的多伦多电影节有时差所以瞓唔到，所以喺一个失眠嘅晚上开始落笔写。”

《风林火山》制作经年终于出现上映眉目，麦浚龙直言感动：“都有感动、感触嘅时候，我觉得每部电影都有属于佢嘅命，我只能赋予佢一个生命、去孕育佢！我成日都觉得，到后期制作最后一分钟，我嘅工作已经完成，之后佢就会有佢嘅路！其实系呢部电影带住我去跑，因为拍《僵尸》嘅时候我系28岁，当时嘅体力、思考模式所有嘢都唔同！虽然今次系第二套执导作品，但系历时好长、系会有攰嘅时候，但系要孕育出一部有棱角嘅作品，所有攰同辛苦都系值得嘅！”

至于《风林火山》正式上映日期，麦浚龙表示需要询问发行商的安排：“当然我希望今年可以，但系我都要先照顾咗即将会睇呢套戏嘅观众先！”梁家辉于节目上开玩笑纸曾经以为电影会在自己死后才正式上映，麦浚龙笑言：“冇呀，佢都好健康呀、冇嘢呀！”