送院途中｜古天乐被车撞飞十米竟冇事 “大声指导”袁澧林助入戏
电影《送院途中》正式上画，戏中古天乐与游学修饰演救护员，而袁澧林就是医院护士。三人一同接受访问，讲到电影在数年前拍摄，当时袁澧林因未熟习拍摄现场，而被古生“大声指导”，但又正正这深刻教导，有种袋钱落袋的感觉。而相反，游学修又因为倾剧本，曾经“大声反驳”古生，从而撞出新桥段。学习有很多方式，你想要边样？
古天乐被车撞飞弹十几米
讲到坐白车的经验，古生原来都有超惊险的一次，整个人被Van仔撞到飞弹十数米，但最离奇是没有大碍。“当时是中五毕业，开心得滞，唔小心冲出马路畀架Van仔撞，撞到飞弹十几米，校服碎晒，系碎晒！昏迷咗十几秒。身边同学猛叫我起身，我最后都起到身，识得猛话冇嘢，冇嘢！然后睇番撞我架Van仔，成个车头凹咗一个人形出嚟，个司机瞓在軚盘晕咗。于是大家Call白车，呢次就系我第一次坐白车。我都冇留院，联针就出院，反而司机要留院，佢个头撞爆挡风玻璃。”成个过程讲完，现场人人都觉得匪夷所思，但又是古生的亲身经历，十足超级英雄故事一样。
袁澧林未熟习演戏被“大声指导”
戏中袁澧林饰演一个爽朗兼烂口的女仔，在戏中粗口横飞，而且流畅到不得了，问到袁澧林如何练习？“平时都有练开，哈哈哈……讲粗口都有好处，唔系用嚟闹人，喺抒发情绪方面系好好，令个人冇嘢屈住。”由于电影在4年前拍摄，袁澧林对演戏的触感未够，于是要以模仿搭够。“我在拍摄时系扮紧导演卓韵芝，所以角色对爱情都有阿芝的风格，讲嘢都系好直接，又有啲粗口。”
未熟习演戏，便遇上影帝古天乐，心惊胆颤，愈紧张就愈易出事，结果有场戏真的被古生在现场“大声指导”。“呢场戏最后好似cut走，当时我记熟晒剧本，去到现场就谂住背晒出嚟，但其实现场好多变化，你要代入角色，用角色思维去解决问题，但当时我好明显转化唔到，完全做番自己反应，咁就错晒，于是古生就指导我，唔讲‘闹’呢个字，系大声地指导。”
闹完都有氹番
古生都直认不讳有这件事，但其实这是一种最快的方法令她达标。“呢样系林岭东教我哋，如果你进入唔到个状态，就要揾一个方法进入。我都试过拍部戏，要个女演员喊，导演同佢讲成粒钟都未喊到，然后我走埋去讲几句，佢就喊到收唔到声。Cut机后导演仲问我讲乜，我话讲佢老豆老母啰。唔系问候呀！真系讲佢父母经历，因为佢事前同我分享父母嘅经历，我一直放在心，于是呢刻提番起佢就喊得出。”
问到袁澧林当时可有为此感不快？“一定会唔开心，但又真系演得好顺利，只系事后都系会嬲爆爆，自己坐埋一边，但当时古生就发挥铁汉柔情，拧个头问我︰‘你点呀？’佢系唔望你，但都系关心，啲男人真系……哈！”
游学修同古生嘈过交？
袁澧林被古生闹过，但游学修就相反，因为创作事宜跟古生有所争拗，仲闹得面红耳热。原来当时游学修正在参与剧本创作，但古生又忙于拍戏，于是捉游学修到片场，拍完戏收工便跟他倾，瞓醒又倾，如事者经历个几月。游学修︰“佢拍摄以外时间就系倾剧本，个几月就是不停倾，期间都有月闹交，有啲嘢讲完你又唔听！当时系嬲大过怯，不过闹完就算，创作一定会有坚持，会有火花，如果下下你讲乜都好好就唔使倾啦！”
古生亦认同度桥过程一定包含争拗。“系会咁，如果大家文质彬彬，就住就住系唔会度到嘢，一定要有闹交，有时坚持会啱，亦有可能错，但如果唔坚持，好顺民去完成件事，呢个唔系一个创作。”结果二人合作至今又成为旗下艺人，证明被人闹好，闹人好，都系对事不对人，完了便抹走去重头来话。
鸣谢
古天乐
发型︰Dan Tam @ O4
化妆︰Carman Man
游学修
发型︰Vic Kwan @II alchemy
化妆︰Yvonne Yeung
袁澧林
发型︰Lupus_chui@ orient4
化妆︰Jenny Shih
Venue: The Mira Hong Kong