水饺皇后︱惠英红曾光顾臧姑娘　忆贫苦童年：喺湾仔卖香口胶乞食

香港怀旧温情传记电影《水饺皇后》，由刘伟强监制执导，内地百亿票房影后马丽、惠英红、袁富华、太保等主演，电影改编自创办“湾仔码头”品牌、有“水饺皇后”之称的臧健和的生平事迹，以七十年代旧香港作为背景。《水饺皇后》今日（1日）于香港举行首映礼，导演刘伟强携同马丽、惠英红、袁富华及一众演员亮相，饰演“包租婆”的惠英红与饰演“糖水伯”的袁富华在首映礼上接受访问，直言与成长回忆非常贴近，分享到不少童年的辛酸与贫苦记忆。

惠英红受访时表示，《水饺皇后》剧组精致重现出旧香港板间房的置景，与自己成长环境非常贴近：“我喺铜锣湾板间房住过三四年，我哋嘅包租婆亦系湾仔嘅风尘女子，储到钱就买咗层楼，好多租客都好穷，我妈妈都试过欠租。包租婆当年话等下一艘船泊岸，有美国水兵上岸，赚到钱再一次过交租，感觉好似我细个𠮶种环境、𠮶种人物，于是想用返我细个见到嘅包租婆𠮶种方法去演。”

惠英红忆述自己童年在湾仔为口奔驰的景况：“其实好多人都知我有十几年喺湾仔卖香口胶、叫做乞食啩！喺𠮶啲环境每日都见到好多生离死别、人情冷暖，好多温情守望相助。虽然𠮶时可能得十岁，但思维成熟程度可能有廿几岁！点会唔知每个人背后嘅故事？好多吧女会特别同我讲佢哋嘅遭遇。我妈妈每日都会陪住我哋去湾仔、佢坐喺楼梯底睇住，每日成十个钟！大家都会理解到当时嘅遭遇。”她表示有向薛凯琪、王祖蓝等演员分享与他们吧女、富二代角色相关的真实背景故事。

对于《水饺皇后》主人翁臧姑娘，惠英红亦是难得有一面之缘、擦肩而过的人：“我喺湾仔都有偶遇过臧姑娘几次，食过佢嘅车仔牌档。”表示当年长居九龙，每晚都要乘坐俗称“哗啦哗啦”的渡船返回九龙：“哗啦哗啦正正在喺湾仔码头，我哋收工十二点几、返到去屋企一点几，所以都会食湾仔码头嘅车仔牌档。我妈妈系山东人，所以好多时候都会食山东炸酱面，记得有一档女档主卖水饺，因为冇女人㗎、全部系男人，后尾都有问返妹妹系唔系臧姑娘。有问过臧姑娘个女，时间系差唔多嘅。”

饰演糖水伯的袁富华，同样成长于该年代之中，生活简况亦相当接近：“我哋成长大部份人都穷，通常都系住冇䢂嘅唐楼，上到去系板间房、甚至只系得个床位（惠：或者系布帘！）一齐用个厕所。最记得细个冲凉就喺个水龙头侧边，冇私隐㗎，有人行过攞水又要让开少少，但我冲紧凉㗎㖞！依家唔会系咁、冇呢枝歌仔唱啦！”谈到在港岛街头打滚，袁富华表示：“红姐系喺湾仔，我就喺西营盘，因为我爸爸就系喺码头做苦力。”更透露原来年青时亦曾当过小贩：“𠮶个年代好多人做小贩，我自己中一二就开始做，不过系卖成衣嘅！喺依家港澳码头，推架车仔出去，因为未有咁多成衣铺，入货类似名贵T裇、但全部翻版货！接触好多人、好得意，令个人成长好多！”

在《水饺皇后》与马丽对手戏份极多的惠英红，大赞马丽的语言天份，表示拍摄时会将对白广东话部分的抑扬顿挫向马丽示范一次：“我就奇怪点解唔用广东话同佢做访问，佢讲得几好㗎！好似我妈妈以前喺湾仔叫山东婆，但佢觉得自己广东话好好，不过其实冇人听得明！我成日同我阿妈讲笑‘喂！山东婆！山东话系点讲㗎？’佢话佢系讲广东话㗎！唔记得山东话点讲喇！”

惠英红更以导演刘伟强大开玩笑：“喺现场最麻烦嘅其实系刘伟强！又大声㖞！但系佢表达嘅故仔，佢系讲得好明白，佢好放手畀我哋演员做、又好肉紧㖞！搞到我成日话‘导演你唔好嘈住先啦！’”更续以导演的普通话开玩笑：“佢钟意开口用普通话，佢嘅普通话系冇人知讲紧咩！听唔明㗎，连马丽都问我‘姐！佢讲咩呀？’但导演最近威呀，话有人垫底！”随即逗趣地望向袁富华，令Ben哥笑言：“我知呀！因为我哋路演，大家知我啲普通话‘好到不得了’㗎啦！搞到刘导演话终于有人垫底！”

惠英红近日成为首位荣获华表奖的香港女演员，直言非常开心与荣幸：“好多谢我所有嘅团队、我屋企人！同埋我好多谢我自己，成个过程大家有眼睇到，我每一步都好辛苦，所以能够得到咁大嘅认同，真系好唔容易！”更续指下一个目标为金鸡奖：“锁定㗎！又唔系一定话要嘅，得到一个剧本角色唔代表一定攞到奖，有机会会接到烂剧本，但我会好努力将自己部份做到最好，起码烂嘅地方唔好喺我身上！”