黄秋生笑言新戏冇收钱　MV重现《无间道》堕楼：冇我嘅穿透式演技

香港电影工作者总会今日（22日）举行2025年度春茗晚宴，会长古天乐携同田启文、黄秋生、苏玉华、张继聪、谢安琪、卫诗雅及周家怡等一众演员出席。“总会拍电影”计划作品《不赦之罪》主演黄秋生、苏玉华与George欧镇灏亦有出席春茗，三人亦一同接受传媒访问，作为计划首部上映作品，黄秋生笑言：“咁巴闭㗎咩？非常荣幸呀！”

近日《爸爸》监制透露刘青云自愿削减片酬演出，黄秋生笑言“零”片酬接拍：“我好似都冇收钱！”苏玉华随即笑指：“未收钱啫，唔系冇嘅！”黄秋生继续一贯幽默本色：“唔系喇，我问下佢先，原来有钱㗎？”谈到与苏玉华合作，黄秋生大赞：“直情冇得顶，如果冇咗佢我都唔知点演！（苏：你唔之前当面赞我？）妳有老公㗎嘛，讲埋啲咁嘅嘢，惊误会嘛！”至于首度与新晋演员欧镇灏合作，秋生更力举四个优点：“又靓仔、又勤力、又听话、又乖！唔错，继续努力！”

早前黄秋生于网上节目中评论Tyson Yoshi与YT周殷廷新歌《1994》MV期间，引起不少网民回向，黄秋生坦言狠评背后原因：“因为佢模仿啲垃圾歌模仿得好似，因为当年啲歌系行货、垃圾歌，听完之后哼唔返个旋律，会唔记得。同埋啲车系嘥多咗钱，同样效果（可以唔驶炒），做咗老衬！”至于云浩影于MV中重现黄秋生《无间道》的堕楼一幕，秋生笑言：“完全唔同！佢打横咗！阿女冇我𠮶种穿透式演技！”欧镇灏亦表示：“唔够饥饿！”秋生又再大赞：“叻仔，佢知呀，唔够饥饿！”

黄秋生作为三届金像影帝，对凭《虎毒不》提名影后的谈善言赞誉有加，更扬言对方有冠军相兼实力：“我有一日突然之间见到佢个样，觉得佢有冠军相！我纯粹同睇相角度。𠮶部戏我睇过，佢做得好好，佢的确系非常努力，同做得好好！”秋生笑言未思考与谈善言的合作空间，并笑指：“我最近画画多、作曲多，唔驶同人合作。”