古惑仔主题冰室｜投资7位数重本装修　主笔牛佬：本身得几幅画咋

香港经典漫画古惑仔多次翻拍成电影，今日（27日），由牛佬（文启明）、明哥、Ken哥有份投资的友情岁月古惑仔漫画主题冰室正式开张，更请来有份参与演出的陈惠敏（骆驼）、卢惠光（太子）等人出席开张仪式。

摄影：叶志明

冰室除了以漫画风为主外，更特别开设一间VIP房，其中一间以洪兴为主题，十足戏中讲数场面一样，背后一幅大墙写有训示，一幅红底黑字极大个“义”字、顶上吊有数十个砂煲，就连陈惠敏、卢惠光、牛佬都赞口不绝。

对于今日冰室开张，牛佬表示其实筹备咗至少两年。“疫情前已经谂紧，去到2020年7、8月正想开张就碰上疫情，又估唔到疫情维持咁耐，唯有慢慢拖住嚟准备、调整、装修，希望做到尽善尽美、精益求精。”

点击睇古惑仔主题冰室有咩食，装修有几豪

而问到点解会有开餐厅想法时，牛佬回应：“其实初初唔关我事嘅，系（拍档）伦裕国周围食嘢，认识到啲食肆朋友，大家讲开不如开返间古惑仔餐厅，用古惑仔个名去做，但最初好简单只系摆几幅画，倾下倾下加上疫情拖住，变咗愈做愈大，先做到而家咁仔细。”另外问到今次投资了多少钱？有冇谂过翻本问题，牛佬表示：“呢个系商业秘密嚟，不过真系过7位数。冇特别谂过翻本问题，但觉得应该会好旺，我谂半年内应该可以（翻本）。”