【阿拉丁】网民推恶搞版做主题曲　二创陈夕︰已准备埋《狮子王》

迪士尼真人版电影《阿拉丁》近日上映，不少粉丝都指出戏中主角Mena Massoud同Naomi Scott跳得又唱得，早前公开了《阿拉丁》中文版主题曲，由陈伟霆和张碧晨合唱《新的世界》（A Whole New World），虽然有网民指“听到耳朵流产”，但其实坊间仲有隐藏版《A Whole New World》，唔知大家又有冇听过呢？

“白雪……白雪呢个名真系好难听，好难听呀！”相信大家对呢句说话一定唔陌生，2006年一个名叫“陈夕”的YouTuber上传一段有关“白雪公主”的恶搞配音版动画，由于对白抵死又搞笑，当年所推出的《新白雪公主》，《新美女与野兽》、《新灰姑娘》等点击率都超过二百万，威力十分之大！

上月24日“陈夕”突然回归更开设Facebook专页，扬言够10,000人关注才会考虑放新片，当然香港人不负众望，至今专页已经储到约38,000人关注，而且原来“陈夕”所讲的新片，正是跟近日上映的《阿拉丁》有关，而二改的歌曲当然是主题曲《A Whole New World》啦！

由“陈夕”二改的《A Whole New World》歌词够晒贴地引得网民狂赞，至今有37万4千人睇过，1万2千个Like，内容大致讲及时下年轻人钟意去旅行，就算无钱都好想去旅行，借钱都要去，配词够精准又啱音，加埋“废青、旅行、廉航、即兴、揈钱”等等字词，点样唔吸引网民广传兼Like爆呢？

句句都有声　唱出时下港人心声
其实第一句已经讲中晒大家心声“每日都想旅行，发梦都想去开心”，而去到由高素瑜（Zody Kou）唱出的女声部份就更加抵死，似乎有点想营造所谓“港女”感觉，“但无钱坚持要乱揈　月尾我点样过　行乞咁过　你呢啲正一X街诱惑我”。去到后面一句“就快使晒　又丧碌卡条数劲劲　（几多钱都借俾你）但我要点样借　还到先借　我呢铺变梗乞衣要破产　收嗲啦死八婆！”就连政府宣传标语都运用得得心应手！而最重要的是唱出了时下“上车甚艰难”，“就算去少几次（旅行），仍未可以，担起买楼毕生这大志。”由于整首歌太入脑的关系，令到他都不禁写下“你班友睇阿拉丁真人版𠮶时唔好谂起我”！

包场睇《阿拉丁》　大合唱先系目的
今日“陈夕”接受《香港01》访问，问到他为甚么事隔多年突然回归，他笑指：“太耐无做创作，痕痕地，咪揾啲嘢搞下，拣《阿拉丁》系因为佢就快上真人版（经已上画），顺势帮佢免费卖下。”而早前他在Facebook专页上开设投票问粉丝愿唔愿意和他包场睇《阿拉丁》，他认真表示：“坚会包场，依家揾紧地方，想一齐睇嘅朋友唔好睇住，等我！同埋大合唱先系重点同目的，横掂要等首歌，顺便一齐睇埋戏。”

爆料早已预备好《狮子王》
除了《阿拉丁》7月更会有《狮子王》上映，“陈夕”爆料表示其实《狮子王》一早已经预备好，预告都已经有得睇，“日日都要晨咁早死去返工，攰到我趴街，其实我嗲哋会唔会偷偷地收埋几十亿身家，专登唔话俾我知呢？”明显地今次就系讲打工仔以及穷L的辛酸！
相比起十多年前的“白雪呢个名真系好难听”，其实近来的二次创作较为贴地，问到他现时玩词会不会有分别时，他指：“同十几年前已经好唔同，以前会系讲啲无聊低能嘢多，内容通常无乜意思，纯粹系反转原意，由魔雪奇缘开始，依家会有内容，反映紧现时社会上嘅状况。”

坊间隐藏版“陈夕”《A Whole New World》