【金像奖2019】吴彦祖杨千嬅重聚《新扎师妹》方丽娟区海文掀回忆

第38届香港电影金像奖颁奖礼已经圆满落幕，各得奖者固然系焦点，但典礼上嘅颁奖嘉宾一样好有睇头。吴彦祖（Daniel）近年长居海外，呢次专诚返港担任颁奖嘉宾，孖住20年前作品《特警新人类》嘅拍档谢霆锋、冯德伦和李璨琛担任“最佳视觉效果”颁奖嘉宾，一出席即刻喺网上洗版。但其实喺后台佢同杨千嬅合体，都令大家回忆返晒嚟﹗

Daniel喺IG上载多张照片，有4位喺颁奖台上，以及后台所影嘅合照，并留言话好难相信《特警新人类》已经系20年前嘅事，仲问网友想唔想睇另一套佢哋几位合作嘅戏。另外仲有一张同杨千嬅嘅合照，Daniel亦大赞对方Keep得相当好﹗一见到呢个组合，大家都不其然谂起《新扎师妹》中经典情侣档，方丽娟同区海文。

2002年嘅《新扎师妹》票房达1100万港元，千嬅同Daniel当年更传出戏假情真。眨下眼佢哋已经分别结婚仲做埋爸爸妈妈。呢次重聚唔止网友感触，千嬅亦喺IG分享合照并留言：“最开心惊喜是遇见了“旧情人”区海文。相识于微时，超过20年了。虽然他大部分时间都在美国，但他一直努力及坚持自己的演艺事业，甚至当上制作人，他的作品 #intothebadlands 很精彩，看到整个剧组团队的用心和艰辛的拍摄过程，值得大家支持﹗希望及期待他回来多拍香港电影，we miss you，希望有机会再合作﹗”