【金像奖2019】《无双》横扫惹争议 庄文强︰我仲有向20部戏致敬
《无双》在本届金像奖一共获得17项提名，最后更获得7个奖项，可说是满载而归，成为本届金像奖的大赢家，当中包括最佳电影。身为《无双》的导演及编剧庄文强，更摘下最佳编剧及导演两奖。
电影自推出以来，都备受争议，最为观众诟病是有指创作上，跟荷里活旧作《非常嫌疑犯》有类近。早前庄文强参与亚洲电影大奖时，便接受《香港01》专访，除说到自己的入行经历，更讲到《无双》的创作由来，连网民的质疑都大方回应。
谂过下半世教书
庄文强在1999年凭《失业皇帝》步入电影圈，今年亦是他入行的第二十年：“其实我开头冇谂过入电影圈，𠮶时我已经浪费咗五年时间喺呢行，做电视同时Part-time做电影，但𠮶五年就冇乜收入，系剪过若干电影预告，拍过啲Making of，写过啲剧本又冇人要，所以谂住读个博士学位，以后可以教书，呃啲学生钱。”
可是在因缘际遇之下，庄文强还是步入了电影圈，工作接踵而来：“我辞咗份工之后就有桥，嘉禾总监庄丽珍小姐就叫我：有个剧本你过嚟帮下手啦，𠮶套系《阳光警察》，帮帮下就俾隔篱嘅马楚成导演揾我帮手做《东京攻略》，然后又被陈木胜导演知道我写紧剧本，揾我去写《特警新人类》，搞下搞下就到今日咁。”
兼任导演和编剧
在一部电影里有导演和编剧双重身份，庄文强说在处理上会比较方便：“其实导演同编剧系两样嘢，譬如好多时写完剧本，未必一定实现到，导演就系要将文字变成现实。我自己又系编剧就好方便，譬如我做导演嘅时候要求个编剧改剧本，咁我就要求自己改，件事变咗易啲，唔使打电话。调返转我系个编剧，我唔希望个导演乱咁改我个剧本时，同样都系唔使打电话，自己同自己讲就得。唔系话权唔权力，最紧要系方便！”
双重身份除了有便利，在肩上的压力也是两倍：“如果自己兼任就有种我手写我心嘅效果，啲嘢会直接啲，同埋赢同输都冇得赖。好多时导演会赖编剧、有时编剧又会赖个导演，自己一个人就冇得赖。”自己要对电影的成绩负责任。
《无双》的由来
原来《无双》从剧本阶段到在大屏幕上放映，一共花了九年时间，庄文强：“其实《无双》个剧本出现喺2009年，𠮶阵于冬先生第一个听到，但呢个剧本喺当时系好敏感，原则上系过唔到内地审查，冇一个大嘅市场就冇大嘅资金去拍，就一直搁置咗。于冬先生一直都锲而不舍，所以期间我都冇乜四围Sell过，直到几年前过咗审。”
当问到如何请到两位影帝级人马同场斗戏，庄文强笑说其实幸运成份居多：“现实系你嘅Budget有几多，系睇你嘅Cast有几大。我一开始揾咗Aaron（郭富城），Aaron好钟意个剧本，佢经理人小美姐睇到剧本又发现原来我写紧周润发，佢就帮我约周润发，发哥睇完又好钟意便应承，我先能够有呢个钱去拍，可以话系运气造就成件事，运气比重好大。”
庄文强这个名字是障碍
庄文强已是业内有名的电影人，有一定地位，当被问到是不是庄文强这个名字已经是一个品牌，不用太费力去找投资者、演员，他极力否认：“唔系话有个名就得，始终人哋嚟买嘢你都要有件货。其实我个名系一个障碍，啲人一听到我个名就会话：‘俾个剧本嚟望下！’大家都知呢行啲人都唔睇剧本，就听个导演讲个故仔。我成日都问啲演员：‘你哋系咪恰我有剧本？’个个都问我攞剧本又留难我一番。”
《无双》剧本争议
看毕《无双》，有些人却从中看到了1995年美国电影《非常嫌疑犯》的影子，庄文强正面回应：“你话似《The Usual Suspects》（非常嫌疑犯）嘛？其实我去咗世界咁多地方，好多人都有提到呢个问题，但大家都唔觉得系一个咩问题，只有香港最觉得系一个问题，反而内地都不觉得系咩一回事。”
庄文强又补充说道：“我谂《无双》剧本嘅时候好想做到好似一首歌咁嘅结构，𠮶只歌叫《K歌之王》，譬如你睇《无双》，好多人话睇到《The Usual Suspects》，其实你仲睇唔睇到其他更多嘅电影喺里头？作为一个电影爱好者，处理呢个剧本嘅时候我系玩得好开心，里面有超过20部戏，亦都系某啲钟意《无双》嘅影迷揾到到个中乐趣。”
想落力撑香港本土电影？即刻上Now E即租即睇专区，只需$22起就可以48小时内欣赏最人气港产片！（按此）
被问到在自己的电影中投入其他电影的元素是致敬，还是看完电影后太喜欢自己也不为意重叠了想法，庄文强则回应：“两样都有，尤其是我系一个咁钟意电影嘅人，有时候忍唔到手㗎！咁好玩！我成日都讲《无双》系我同电影之间一个好大嘅玩笑，但呢个幽默得我自己知，真系好失败。”谈到新的电影计划，庄文强说：“梗系有啦，唔系食西北风咩？要揾食加嘛！你系创作人，梗系有故仔想同人讲嘅！”又坦言日后会较集中于编剧工作。