【金像奖2019】《三夫》《沦落人》未上已大热　谷德昭：唔同玩法

第38届香港电影金像奖将于今年4月14日举行，作为年度影坛盛事，能够入围角逐奖项嘅电影、艺人、幕后功臣，通通升价十倍。不过大家发唔发觉，近年睇住份入围名单时，会觉得有点陌生？作为影坛活跃份子嘅谷德昭都有同感，呢日佢上载同《三夫》女主角曾美慧孜合照，并喺网上留言慨叹：“抱歉我还未看过《三夫》，不是不想看，只是看不到。”

谷德昭︰“一早预售晒，神心都冇用”
近年香港影坛趋向两极，大型合拍片例如《无双》入围角逐多个奖项属平常事。至于小本拍摄嘅本土电影例如《沦落人》、《非分熟女》、《逆流大叔》一样获评审青睐。但普罗大众有几多人真系有机会睇过晒呢d入围作品？谷德昭话：“看过的都说曾美慧孜在《三夫》中的演技很出色，抱歉我还未看过《三夫》，期待。不是不想看，只是看不到。作为金像奖有份投票的一份子，曾经好神心地想睇晒𠮶几出行内睇好会攞奖嘅戏，但真系冇办法，就算上网揾到有一日有一间戏院上映几场，但哈哈一张飞都经已一早预售晒，神心都冇用。”

【金像奖2019】吴镇宇《逆流大叔》再提名影帝　秋生成最大阻力？

最想跟观众同步呼吸
根据金像奖官方网站列明参选电影资格，要上一年度“于香港作首轮公开售票放映，连续七天内于五十个座位以上的影院放映不少于五场的香港电影。”今年入围名单中，《三夫》、《沦落人》、《非分熟女》、《G杀》都未曾正式上映，对于只睇过预告片嘅普罗大众，对传媒及行内人吹捧某一两位候选人为大热门，除咗不明所以亦无咩投入感。虽然谷德昭有办法优先观赏，但佢话：“我入戏院其中一个大原因就系同普罗观众捞埋一齐睇戏，同步呼吸、感受一出戏。同业内人仕一齐睇戏，似开OT多过娱乐。”

有人话香港片商开始以奥斯卡电影策略推港产片，即系小本拍摄作品会拎去参赛，入围或得奖后多咗人认识再安排公开上映，自然收得最高效益，最明显例子就系2018年金像奖于4月15日举行，《黄金花》安排于4月12日上映，当毛舜筠及凌文龙分别勇夺最佳女主角及最佳新演员后，最终便带挈有540多万票房。

【金像奖2019】《逆流大叔》牵头　港产片靠多元化本土题材回春

谷德昭都不禁话：“巿道艰难，小本经营，如果能够在攞到奖项后才挟声势上映，当然会有较好成绩，完全明白。怕只怕金像奖会逐渐变成预告片，预告将会有什么好片并已颁了奖项，普罗观众在之后才按得奖名单索骥。咁系咪唔得？又唔系唔得，因为符合了白纸黑字，只系唔同咗玩法。2019年，我感受最深嘅系 - 咩都唔同咗玩法。”

即刻投票，拣选你心水男、女主角，仲有你最撑嘅香港电影，即有机会获得戏飞。

《香港电影我撑场．民选大奖2019》投票专页：https://voteforhkmovies.hk01.com/