圣诞必睇《真的恋爱了》　经典示爱纸牌出自边个手笔？

又到圣诞～又到圣诞～除咗开P、睇灯饰同食大餐，睇戏都系其中一个庆祝圣诞嘅必备节目。历年来有咁多圣诞电影，大家最钟意睇边一部？相信15年前上映嘅《真的恋爱了》（Love Actually）会是心水之一。以下就同大家讲讲几件有关呢部戏嘅趣事，其中当然包括最经典的揭纸牌示爱。

4大删减情节

最初剧本原来有14段关系，但因篇幅所限，其中4段被删走，当中两段仲已经完成拍摄。未拍嘅人物故事同一位坐轮椅嘅女仔有关，而另一段系讲Band仔录歌畀同班女神示爱，但原来对方跟鼓手早已搭上。至于已拍摄的剧情就关于一对面对饥荒嘅非洲情侣，以及拥有同性伴侣嘅女校长。

戆豆原来系天使

戏中饰演百货公司珠宝售货员嘅“戆豆先生”路云雅坚逊（Ronan Atkinson），原来其角色最初设定系天使！其中一幕佢协助小朋友Sam喺希斯路机场突破守卫追女仔后，接下来佢会蒸发消失，证明佢并非人类，但导演Richard Curtis觉得这设定太Over而放弃咗。

更多剧照

示爱纸牌系演员真迹

戏中Andrew Lincoln爱上好友老婆姬拉丽莉（Keira Knightley），最后更上演一幕浪漫纸牌示爱戏码，成为经典电影场面。据演员受访所讲，每一张纸牌都由佢本人亲手写，“我跟住美术部嘅铅笔笔迹去写，真系我亲手写！”

虽然示爱方式好浪漫，仲成为往后好多影视作品嘅借鉴，但其实好多影迷都唔钟意Andrew同姬拉呢一对，事关姬拉已经有老公，仲“恋搞好朋友”当众Kiss，根本就系偷食。

重温经典一幕

纸牌示爱本来不存在？

导演透露Andrew Lincoln向姬拉丽莉示爱嘅方式曾经有5个方案，仲专登向每一位女同事征询意见，其中一个方案系男方在女方屋外花园摆满玫瑰花，但头4个方案都系换来女同事“妖妖”声，最后先拣到纸牌示爱。

片尾接机场面系真偷拍

虽然戏中并非每一段关系都有完美结局，但片末加插嘅路人机场接机画面就够晒温馨。原来剧组真系于禁区外设置摄录机，花了一星期时间去捕捉这些画面，并非预先安排嘅伪偷拍。

晓格兰特最痛苦演出

著名影星晓格兰特（Hugh Grant）於戏中饰演英国首相，与家佣展开一段浪漫故事。但原来晓格兰特本人并不特别喜欢呢部作品。“我唔明《真的恋爱了》点解仲咁受欢迎，一到圣诞个个都会睇，都好嘅”，佢仲话其中一幕热舞戏系佢拍过最痛苦嘅场面，顶自己唔顺。