【赌侠1999】张家辉奠定笑匠之作　“化骨龙”式演绎可一不可再

20年前今日，电影《赌侠1999》上画，这部奠定张家辉笑匠地位的作品，令他好一段日子继续拍下不少爆笑作，例如《化骨龙与千年虫》、《黑马王子》、《千王之王2000》等，所以对不少家辉迷嚟讲，呢部简直系熟到识背。
要数呢部最经典对白，头位相信会是︰“X你个街，亚视嚟嘅喂！”不过另外有一幕，佢用好几首歌名串成一段对白，去说服朱茵向刘德华（阿King）表白一幕，又系好鬼过瘾，你又背唔背得番出嚟呢？

“家咩姐，我姓甘”一句成名
1998年的张家辉，迎来人生事业上第一个高峰，因为那年年初播出剧集《天地豪情》，甘量宏（Kelvin）一角抢尽主角大头文（罗嘉良）风头，一句︰“家咩姐，我姓甘㗎！”尽显见钱开眼泯灭人性。人气咁劲，向来有商业触觉的王晶当然唔放过佢，立即找他拍电影，仲要跟伙拍刘德华，拎番“赌侠”呢个金漆招牌出嚟拍《赌侠1999》，甚有接班味道。

戏中饰演老千的刘德华阿King，一次出千断正，掀起打斗受伤导致色盲外，更误杀了烟囱（吴毅将  饰），被判入狱五年。出狱后，巧遇一直崇拜他的赌仔化骨龙（张家辉　饰），经历过不少次出生入死后，更成师徒跟拍档，King更与化骨龙妹妹晴（朱茵　饰）交往。之后剧情如何不重要，最重要都系睇张家辉点发挥。

一口气串足8首经典歌名
除咗压轴扮朗拿度呃马交文，当然仲有经典对白︰“X你个街，亚视嚟嘅喂！”呢下系好笑，但要数佢扮情深，扮有文化一幕，不得不数他怂恿个妹向阿King表白，当中仲用咗好几首广东流行曲歌名串连起来，你又记唔记得有边几首？剧情讲到个妹见到阿King同佢个仔玩得咁开心，不是味儿。

做阿哥的于是激励佢︰“你咪成日挂住个青面仔，一于饮杯《忘情水》，唱番首《我活得比你好》，《日出时让恋爱终结》，睇下白头佬几时讲《你是我的女人》，大家生番个《笨小孩》，咁咪《你的名字“佢”的姓氏》，咪《爱是永恒》啰，你《总有一天等到“佢”》”一口气串起8首广东经典，仲要全部都系刘德华同张学友嘅歌，好怀疑都系张家辉的自选集。