【女皇撞到正．专访】麦芷谊曾一年冇开工　父责问“几时先玩够”

如果大家有入场观看刚刚上映的电影《女皇撞到正》，你会发现饰演张继聪死去女友的演员非常熟口熟面，但未必认得出她到底是谁，到片末roller在银幕上升起的时候，或者事后睇相关资料时，至知道这个Punk Rock女孩，原来是曾在《同班同学》中演出的麦芷谊（Koyi）。鬼咩，真系成个Look都唔同，点认啫。

麦芷谊近来工作不少，除了参与《女皇撞到正》拍摄外，她亦有出演港台剧《没有墙的世界6》（2018）和《手语随想曲6》（2018），还未计算一些微电影演出，以及初尝参与剧本创作。但其实她曾陷入低潮时期，有近一年时间完全没有接到演艺工作，她坦言这与自己在《同班同学》（2015）中有全裸演出不无关系，“《同班同学》喺香港嚟讲的确系尺度比较大，以呢套戏做起点，我都知条路系会崎岖啲，会比起做青春剧、靓靓女女咁出道难行少少，但畀我拣多次，我都系会拣拍《同班同学》。”

麦芷谊非常清楚香港观众反应两极，一方面有人非常欣赏她的演绎和付出，但另一方面却有人将焦点放在她的身材上，甚至觉得她想一脱成名。她指自己被人误解的确失望：“唯有靠时间同努力、坚持去证明自己唔系咁。”虽然她没有想过自己可以靠《同班同学》变成接约不断、炙手可热的新星，但她亦没有想过会完全“冇嘢捞”。

大学读纺织及制衣系的麦芷谊在参与《同班同学》拍摄之前，曾经为港台剧集《DiY2K》演出，之后做过全职售货员，起初以为自己会“做过世”，但思前想后便觉得演艺事业比较适合她，所以毅然辞职，更听从现时经理人的意见，参与电影试镜：“当知道自己有份拍《同班同学》，仲要系做女主角，真系好似中咗六合彩咁！我好记得当时我系喺地铁站收到电话通知。”

由“中奖”到拍摄，再去到冲出香港出席各大影展，麦芷谊都非常高兴，但她好快便意识到“出出哋事”，她说：“有一段颇长时间冇嘢做，屋企人都叫我转行，问我‘咁样做Part-time做到几时’、‘揾份长工有大假、福利同花红好好多’。有一次阿爸送我搭车，佢问我‘你几时先玩够’，我系呆咗唔识答，之后谂返有唔开心、有啲介意，因为佢用咗个‘玩’字，我知佢唔系有心。好彩之后签咗新公司，开始有啲嘢做，今年都27岁，仲要系屋企大家姐，都要有啲成绩畀佢哋睇，等佢哋唔好太担心。”

在这段低潮期，麦芷谊既做过兼职售货员，又做过电影的服装助理，她笑言做售货员时就算被客人认出也不太尴尬，因为自己没有所谓的偶像包袱：“我好记得有一对情侣好搞笑，因为佢哋入咗嚟几次，我又唔觉得佢哋系好想买嘢，我谂紧佢哋做乜鬼时，个女仔突然讲：‘你系唔系做过边套戏？’‘哦，你认得我，早讲啦，我惊你想偷嘢呀。’其实多数都系想同我倾下偈，都有好多人同我讲加油，或者问我点解喺度，我都好大方讲，我都要揾食嘅。”

其实她在心底里给予自己一个限期，如果在上年年底前再没有幕前演出，她便“叠埋心水”完全退出，好在彭浩翔让她在《春娇救志明》客串演出兼担任服装助理，不但使她扩展人际网络，亦令她知道电影拍摄是如何运作：“服装助理，可以话系执头执尾，当时要帮演员买Bra同底裤。（帮手洗埋？）梗系要啦，唔洗好唔卫生！”主要负责跟实余文乐的她又指当时不时要帮对方整理衣领：“之前成日听人讲做演员真系好幸福，我做完服装助理后，试过每日做十几廿个钟，跟住个个放工返屋企瞓，但系我就要拎啲衫去洗，我先知道‘做演员好幸福’系咩意思。（洗余文乐底裤系咩感觉？）我唔使洗佢底裤啦，佢有私伙，其实啲衫都系拎去洗衣店洗，唔系我手洗。”

讲到之后的工作，她就指自己没有被《同班同学》全裸演出后的困局吓怕，年初都拍了一套包含裸露镜头的电影：“当然个Focus好唔同，多咗啲内心嘢。（有冇谂过以后唔再除？）有段时间好负面会咁谂，但𠵱家唔会咁，因为咁谂就应验咗人哋讲嘅嘢，即系怕咗人哋点睇，同人哋谂我系想‘一脱成名’一样。”

化妆：Cheryle Lee发型：Kenji Cheng @ Leighton Aveda服装：MARC CAIN场地：My Day鸣谢：Barry @ relaxdearhk