【大星讲】黄秋生获江湖大佬邀拍烂片 “仲揾前亚姐摸我大髀倾”
ViuTV节目《大星讲》继续有黄秋生，继上集讲雨伞运动后片约断绝后，今次故事再推前少少，讲他拍过的烂片。曾几何时，秋生哥都拍过不少烂片，原因当然是为揾食，但有趣是他特别吸到江湖客路。黄秋生︰“有啲大哥想找我饮茶，话听人讲我个人得意，想揾我倾下偈。”亦因为咁，令他遇过不少拍烂片的奇遇。
全靠阿嫂甩身
其中有一次，某江湖大佬带住阿嫂，以及一班穿黑西装的金毛手下，一围台坐低跟秋生食饭谈合作。“据知位大佬都好猛下，平时都仲打打杀杀，咁都要俾面出去听下。”一坐下，就有位“小师爷”般的人出来，跟秋生讲剧本。“佢话故事一开始，有个女仔被人强奸，奸完又被第二个奸，之后再有人奸，仲好享受咁。我听完之后即刻话︰‘唔拍得！’”
话说得斩钉截铁，但此话一出，其身边手下已经装凶作势，看似骑虎难下。幸得秋生够机警，一个转身就向大哥身边的阿嫂埋手。“我走去问阿嫂，你听我讲点解先，你都系女人，一个剧本讲到个女人不停俾人强奸仲好开心，系咪好侮辱女性呢？”阿嫂听到后没有表示，只跟大佬耳语，大佬听完就话︰“唔……我哋再度度个故仔先揾你。”就是这样，秋生凭一个急才成功甩难。“过了一段时间，个大佬仲畀人拘捕添，直头唔使拍。”
【大星讲】黄秋生点解最感激王晶？ 自爆一年失5部国际片约
出动到亚姐色诱
除了用强势压逼，亦有另一江湖中人用色诱技。“旧时拍戏叫7日鲜，我拍过3日鲜添，3日拍一部。后来某大哥觉得3日拍一部辛苦了我，决定俾够6日我，拍够3部！仲出动美人计，揾个前亚洲小姐的师姐著条短裙，一来就摸我大髀话︰‘好耐冇见喇，秋生’最后梗系冇拍啦！”
秋生自言烂片不怕拍，因为当中每一场戏都是试验，好多时拎到剧本就知是否烂，“我都想部部刘德华，但冇咁多导演揾我嘛！”不过他更讨厌是不少电影制作人仍不自爱，继续拍没水准的作品。“试过有个笑位，我听个导演讲已经觉得唔好笑，然后问个导演，佢话剪埋就好笑。啊！你啲菲林有魔法嘅？而家唔好笑剪埋就会好笑，剪埋唔好笑你就话上咗会好笑，上咗唔好笑你就同老板讲下一部会好笑，咁又真系几好笑㖞。”
秋生更说早在90年代已告诫再拍落去只会死路一条。“成日一个题材得咗，就一窝蜂去拍，咸戏得就一窝蜂拍，咸到男人都唔硬，从来只会识一窝蜂，冇想过如何去发展个市场，维系个空间。”