【逆流大叔】吴镇宇首映带囝囝捧场　“佢冇乜运动细胞唔似我”

由吴镇宇、黄德斌、潘灿良、胡子彤主演的电影《逆流大叔》，早前举行了首映礼，身为主角吴镇宇亦有出席，呢一部电影未上映之前外界评语也一致赞好，镇宇都知道呢一件事，“之前一啲优先场有少少口碑出嚟，所以宜家开始有点紧张，想睇睇呢套戏最后嘅成果系乜。”始终系自己主演嘅电影，镇宇今晚有冇带埋囝囝嚟撑场？镇宇表示有带佢嚟，但唔系撑场，“咁宜家暑假，呢一套戏系可以一家大小都可以入场睇下嘅，咁咪嚟首映啰，唔通我睇完又同佢去睇多次咩。”

呢一部电影系一部热血励志电影，每一个人睇完都会吸收到唔同嘅讯息，问到镇宇会想带畀囝囝一个点样嘅讯息？镇宇觉得唔好同小朋友讲咁多讯息，“其实电影嘅讯息要由把口讲出嚟呢，咁部电影都几惨，一个真正电影嘅讯息系会慢慢产生出嚟，唔系靠人哋强迫话畀佢听，而每一个人睇完都会有唔同嘅讯息出嚟，我学电影老师教我，电影嘅作用就系咁啦。”

戏中拍摄过程令到镇宇十分开心，因为镇宇指同一班“麻甩佬”拍戏都几好，大家都存在咗一种“麻甩”感情喺里面。镇宇透露其实自己并唔系一个热爱运动嘅人，但十分之有运动细胞，“我骑马冇人教，潜水都系一阵就学会，好多嘢我唔明白点解，我一拍戏运动细胞会出哂嚟。”但囝囝系咪同你一样热爱运动？“佢麻麻哋，但我睇过一个报导讲佢宜家拥有呢个身型系好事，因为佢心脏习惯咗咁重，方便将来到你一米八高度嘅人，我睇番话发育时期肥少少嘅小朋友系比较有著数。”