【有片】《92黑玫瑰对黑玫瑰》上映26周年　梁家辉英泥头最经典

经典港产喜剧，周星驰嘅作品应该可以全数入选，但，除咗星爷呢？喺港产片最辉煌嘅年代其实仲有好多选择。1992年7月2日喺香港正式公映嘅《92黑玫瑰对黑玫瑰》，由不被看好，凭口碑气势如虹，连续上映5个多月﹗呢套戏更令梁家辉冯宝宝于翌年金像奖，一举夺下最佳男主角及最佳女配角，向经典致敬同时缔造一代经典。

《92黑玫瑰对黑玫瑰》由刘镇伟执导，梁家辉、邵美琪、毛舜筠、黄韵诗、冯宝宝主演，本想向粤语长片致敬，演员大多正经八百讲对白，但同时开创无厘头以外嘅喜剧走向。梁家辉喺呢套戏以前，演正剧为主，即使喺《表姐，你好嘢﹗》亦非担任搞笑岗位。《92黑玫瑰对黑玫瑰》发掘出梁家辉嘅喜剧细胞，冷面笑匠，撚声但表情正经讲对白，讲讲下忽然唱歌兼起舞，令人忍俊不禁。

戏中演员不时会突然唱歌，以歌词表达情绪令人忍俊不禁。改编自翁倩玉日文作品《たそがれの赤い月》嘅《你回来吧》，梁家辉顶住满头英泥，一边唱歌一边急住向黄韵诗解释；仲有梁家辉对著毛舜筠唱“小宝宝，食蛋糕，饭仔mun mun叔叔喂到，食过长大，大过冇坏，饭仔mun mun最莺孤孤”；当然唔少得翻唱自谭炳文嘅《旧欢如梦》，不过大家最熟悉嘅版本，应该会系同年年尾，李克勤食住个势翻唱，又唱又跳嘅版本，难得系同样成为李克勤歌唱事业中的污点与经典。

1992年可算系港产片丰收年，由年初嘅《家有囍事》到扬威国际嘅《阮玲玉》，当年最高票房头5位全部由星爷包办，故此92年又称为周星驰年。喺星爷横扫影坛嘅同时，金像奖当届影帝亦是由喜剧封帝，当年入围最佳男主角有周星驰（《审死官》）、成龙（《警察故事3超级警察》）、向华强（《蓝江传之反飞组风云》）以及梁家辉以两套戏（《棋王》、《92黑玫瑰对黑玫瑰》）。最终凭喜剧封帝嘅却不是周星驰，而系首次挑战喜剧角色嘅梁家辉。此后佢亦接下多套喜剧，奠定其地位。