【挑战者一号‧达哥专访】3岁开始沉迷电玩 被母嘲讽打机无出色

本地网络红人达哥（原名林慧韡），自2011年起打机打到街知巷闻，由起初以串流形式在网上直播打机，直到后来开台做自家直播，观看人数由300人急增至逾万人，不但fans愈来愈多，就连广告、代言都陆续有来。打机打到如此成绩，达哥都算是本地少有，甚至是唯一一人。
摄影：梁碧玲

Fans feel到有收工mode

近日上映、由史提芬史匹堡执导的《挑战者一号》，以电玩少年投入虚拟世界为故事主线，戏中提及的所谓彩蛋，对已入场欣赏该片两次的达哥而言，并不是机迷所讲的“任务”，“打机咪好似部戏入面所讲，最重要系过程，唔系目标，输都有输嘅乐趣㗎！”近年一直以直播打机闻名互联网的他，每次直播都有一定数量fans捧场，“我唔会觉得一定要赢㖞，有输过先会觉得赢嘅兴奋，唔会有压力啰……直播打机其实系我表达情绪嘅方法，即系呢，我有时状态唔好，咁就会设个时限俾自己，尽快喺15分钟内杀死打佬过关，有时系因为好累，但我唔会直接同大家讲我赶收工好累嘛，但我打得衰，啲人就会feel到，会留言话我收工mode，呢啲咪情绪啰。”

梦想原来系科学家？

今年只有30岁的达哥，自言自己3岁开始打机，“当时已经好confirm我系机友㗎啦，𠮶时咪系玩任天堂红白机𠮶啲啰，即系《超级魂斗罗》……就系我开始打机𠮶个年代。”现在已经是“达魂制作”行政总裁的他，是一名香港大学文学院毕业生，主修中文和艺术，更曾出国留学，“我阿妈最初都唔钟意我打机，屋企人都觉得我话晒大学毕业，觉得我点解连经理都做唔成，走去打机。”他指他完全了解家人的担心，但始终人生要向自己负责，不能违背自己意愿，“我系一个比较放任嘅人，管理，我唔系做唔到，系我唔想做……我自己其实梦想过做老师，但我钟意留长头发，咁我睇都冇学校会请我；我又梦想过做科学家，但我理科真系好鬼差，好明显呢世都唔会做到。”

【挑战者一号】动漫电玩界经典人物大晒冷　齐集春丽　丧钟　金刚

打机系一种艺术

“唔好成日打机。”寻常母亲时常挂在口唇边的一句话，达哥的母亲亦如是，不过他自言很小时候已经确定自己是机友，而且更影响个性、恋爱路，“钟意打机嘅人唔一定沟唔到女，系慢热啲之嘛，我好多机友都结晒婚（咁你有冇拍拖？）我都有拍拖啊，唔系追唔到女仔㖞……”达哥笑言打机好处非常多，“我细个打机要做功课㗎！打机嘅人学习能力好强，细个打日本game，唔系好似依家咁有中文版，要自己认日文字，即系逐个试，边个系武器，边个系攻略咁，样样都要自学，好考功夫。”所以话，打机要打得出色，同做好一份工一样咁难，要直播打机打得好睇，学达哥话斋“都好难㗎”，完。