【情人节 ‧ 多图】跟住志明去拍拖 烙印科林示范浪漫打卡攻略
今日系情人节，情侣们谂好点同另一半过未呢？如果呢刻先订位订花买飞，就真系太迟。有冇啲即食唔使同人逼又免费嘅方案呢？
情人节无非想浪漫下，然后向大家放闪，有冇谂过跟住《志明与春娇》电影系列的足迹，去返相关景点打卡呢？我哋今次就揾嚟因合唱《十万个激嬲我的理由》做住短暂情人嘅骆胤鸣同科琳，去四个景点教大家闪一闪。
摄影︰江智骞
必去：牛头角志明桥
讲到《志明与春娇》系列首选景点，必定系二人认识后，在牛头角天桥进行抄牌活动一幕。该景点上年在《春娇救志明》上映时，更掀起过一阵打卡潮，争相去影张Selfie，甚至爬上天桥顶拍下“最独特”一面，险象横生，搞到两位主角千嬅同余文乐都要出来劝大家适可而止。
其实条桥本身已经好正，在桥内影已经够晒靓，仲似足剧照添。科林︰“我之前都在观塘区返工，久不久都会行经这条桥，但从未觉得有咩特别，直至彭浩翔拍出来，你先觉得点解香港会有条咁靓嘅桥！”骆胤鸣︰“一见到条桥我就即刻谂起‘armchannel@gmail.com’（戏中情节），如果一对情侣大家都喜欢这套电影，来到打卡是好Sweet的。”
点去：牛头角地铁站，沿隧道过对面的伟业街，再往九龙湾方向行，去到大业街花园就会见到其中一个天桥入口。
打卡贴士︰最好在日光时段拍，尤其在窗口旁取景，效果最好。如果想有剧照feel，就要揾途人帮手影，放心，这里仍然是情侣胜地，要揾人帮手唔难。
够方便：金钟后巷扮邂逅
戏中志明和春娇的感情，是在后巷“打边炉”打返来的，而这个边炉地就位于金钟太古广场旁边的一条小巷。该巷咁出名除了因为套戏带起，更因为够隐闭，是最佳的“蛇窦”。至于一对情侣，就算唔吸烟，都可以过来走一转，仲可能有机会望到胶袋空中转转转的场景，都几靓。
骆胤鸣没有吸烟习惯，不过就认同这个地方私隐度高，虽然称不上甚么浪漫地，但都可以当电影景点去到此一游。至于声称平时只系“陪朋友打边炉”的科林，就觉得借打火机借到抄牌拍埋拖，真系男士们最佳的FF情节。“唔好话借火机，有时搭巴士都会谂，隔篱位靓女会唔会借故同自己搭讪呢？佢又会唔会瞓着唔小心挨落嚟呢？”深信科林都系为访问效果而咁样讲，科林太唔好摆喺心。
点去：于金钟站落车行，往太古广场出口向左手面行会见到一条小巷，行到尽头便是。
打卡贴士︰由于地点较隐闭，为安全起见最好都系朝早前往。如果要拍出电影感觉，用自拍神棍自拍，有微微低炒效果最好。
医肚：湾仔7仔意粉餐
打卡唔会饱的，点都要揾嘢食，如果跟住志明去揾食，第一集Brenda“试图行骗”台湾仔，位于牛头角的康祥茶餐厅就够经济实惠，可惜茶餐厅早前已结业。高级少少，去第三集一班姊妹为春娇唱打气歌《传说》的西环茶家都唔错，可惜又执埋，真系生意难捞。
结果经大家“严选”，决定延续穷游精神，索性去湾仔7仔食叮叮肉酱意粉。该7仔系第一集志明饮醉酒在收银叫“六个六”的取景地，至于意粉，就系志明最爱，爱到春娇要揾人由香港外卖到北京俾佢食。个餐再平都唔紧要，但紧要有共鸣，食得开心。虽然身为女士代表的骆胤鸣就话︰“我就唔系几钟意食喇，但如果男朋友有偏爱都会陪佢。”相信要揾一个肯陪你挨叮叮意少的女友，都唔难㖞！
点去：位于湾仔港湾道，于会展天桥行落去就即到。
打卡贴士︰男士们揸机，最好隔住块玻璃影落去，而女朋友记得要扮漫不经意地食意粉，咁就营造出一份唯美的电影感啦。
最浪漫：西环码头睇日落
去到第三集《春娇救志明》，志明在西环码头放狗时，遇到女神欧铠淳，从而发生“走狗”事件。就连科林都怀疑︰“系咪真系有咁多靓女呀？”电影在夜晚取景，重点系睇人跑步，不过一对情侣过来就唔好等夜晚啦，可以早少少来影天空之镜，亦可争取黄昏的Magic Hour，睇日落影日落都非常正。
点去：于香港大学站 B2 出口出，步行约15分钟便到。
打卡贴士︰由于码头是卸货区，行经时要小心车辆，另外亦要留意日落时间，把握好黄昏最靓时刻。
翻滚之选︰漫春天
如果要跟足志明的行程，两人情到浓时，最后一站不得不提漫春天。不过又学志明话斋︰“有啲嘢唔一定要一晚做晒，我哋又唔系赶时间！”再唔系浪漫到底，返屋企玩干冰都唔错。
《十万个激嬲我的理由》MV
其实骆胤鸣同科林今次除了要跟住志明去拍拖，两位趁情人节仲推新合唱歌《十万个激嬲我的理由》，咁Sweet的日子，大家就无谓激嬲对方，有咩唔著，听首歌算啦好吗？