【超人特工队2】Pixar事先张扬 情人节平昌冬奥有新预告睇
撰文： 许育民
出版：更新：
继上星期一在“超级碗”内有大批电影释出最新预告后，今个星期三情人节当日，今年暑期瞩目动画《超人特工队2》（Incredibles 2）亦将会在另一体坛盛事《平昌冬奥》内有新搞作，相信会发放全新预告。
《超人特工队》于2005年上画，电影最后出现了超能BB，当时大家已认定会有续集，断估唔到一等要等足13年，要今年暑假先有得睇。电影自宣布启动后，大家都拭目以待。咁有几期待呢？上年底11月推出一条先导预告，全片1分钟都冇，其实冇乜内容，由超能BB做主角，讲佢以一对镭射眼将《Incredibles》招牌个“i”字切割成“II”，就系咁，至今已吸纳到7,900万人次浏览，不得了。
昨日，Pixar便率先卖广告，会在今年情人节（14/02），在平昌冬奥上公开最新预告片。广告片上，见到仔仔小飞化身速度滑冰选手，既合乎主题又衬晒佢拥有的特异功能。而镜头一转，就见到一家五口的超能家族，排排坐，安坐家中睇冬奥，随后就播出上集片段同告知有新造型睇的消息。虽然冇讲到明系咪新预告，但都已令人非常期待，记得情人节Mark实你另一半齐齐睇《超人特工队2》全新预告。