【妖铃铃】吴君如执导寻找港产喜剧味　吴镇宇︰认真拍喜剧惨过死

近年的圣诞或农历新年档，吴君如都会以监制身份带套喜剧俾大家，早前有《金鸡sss》，随后又有《12金鸭》。来到今年，君如换个身份，登上导演一职，一于落手落脚拍番套喜剧俾大家睇，仲出晒面，叫晒好友吴镇宇、方中信撑场。见到好友兴致勃勃，做朋友的一于撑到底，方中信要打孖笠头套扮地中海，吴镇宇要连开夜班加吊威也。镇宇都做过导演，早就劝戒过对方谂清楚先好去马。镇宇︰“佢要自己攞苦嚟辛，都阻佢唔到。”虽然把口讲到咁，其实镇宇由头到尾都系瞓身支持。摄影︰陈顺祯

吴镇宇唔受氹  搞笑都要型

成日话当自己有难，你立即谂起向边个求救，那位就是你的老死。君如要当上导演一职拍套喜剧，第一时间就谂到揾镇宇同方中信帮手，壮壮胆！君如说︰“我一提出揾方中信，大家就好兴奋，觉得平时正正经经嘅佢，好有反差效果。”但同时又担心佢演笑得唔得呢？始终一个喜剧演员，是要在观众面前不停搞笑，大家才会对你产生搞笑感情，从而见到你就想笑。“结果佢好成功，加上说服到佢戴个假发扮地中海，头发系男人命根，咁佢都系好唔话得。”

同一套路，同样有向吴镇宇埋手，好可惜镇宇哥唔受。吴镇宇说︰“佢话型人在喜剧中要丑化下，方中信接受这讲法，但我唔受，我话型人在喜剧更加要型，型到得自己觉得型，无人信先会好笑。”所以镇宇都要戴假发，但就戴一个90年代郭富城头出嚟，好似让时间停止流动一样。

戴完假发个个都惊咗方中信

讲番个秃头，方中信起初是认同好好笑的，但拍到中段，出现皮肤敏感就直接影响拍摄情绪。方中信说︰“试造型一刻系觉得好过瘾，好好笑，又秃头又盛，但当你日日戴十几个钟连续拍40几日后，真系好难顶。”“呢样我有经验呀！”此刻吴镇宇抢白︰“拍《脱皮爸爸》时要化老妆，初初觉得终于有一次为艺术牺牲。试完妆仲觉得几好呀！冇事呀！到正式拍摄，每日焗住14个钟仲要拍40日，简真想发癫。”

吴镇宇补充︰“成件事最荒谬系他要演绎一个为遮掩地中海，所以就戴个假发，于是这个角色就要先笠个头套扮地中海，然后再笠一个假发遮住个地中海，真系为艺术牺牲。”吴君如说︰“现场大家都好胆战心惊呀，好怕触动到方中信的情绪，幸好剧组都理解演员是靠情绪演戏，偶然让他发泄下都好正常，不过现场工作人员都好担心好惊。吴镇宇说︰“其实拍喜剧从来都不轻松，如果是一部认真的喜剧就更加想死，因为要度好耐。”

港产片场拍摄术语

难得3位聚头，都引发3位想起当年，为港产片日以继夜疯狂拍摄的日子，而部分“优良”传统，在今次都有沿用，而那些传统，都有个有趣的名字包装，明明系痛苦的事，听落都舒服点。

一, 要打四圈

听落以为大家等埋位，于是打四圈来消磨时间，但其实原来打四圈是一个痛苦过程。吴君如说︰“其实个意思系大家走埋一齐度一度、围一围今晚拍的场口，对白点讲，度到件事顺先拍，而所花的时间分分钟系打四圈牌咁耐，所以就叫打四圈。”今次比较好是本身已经有详尽剧本，主要是打番一圈梳理下就得，换转以前，就真系连对白都冇，净系知要拍乜，一班演员围埋就度，好痛苦。

二, 补番个甜品

打四圈唔系讲打麻雀，咁番补甜品又点会系宵夜万岁食甜品，所谓甜品即是今时今日讲的彩蛋。有时度好一个Gag，觉得好正但放不到入戏内，于是就待出Credit时出。吴君如说︰“之前拍《金鸡sss》，见首周票房大收，立即拍个加长版，等人入场睇多次。而去到《12金鸭》，电影上映首周揾到彭于晏，于是自己同制片两个人托住部机就冲上去拍，即剪即上。”不过这都是港产片的味道，现时合拍制度，加片段就要再审查一次，所以现在只有摙到最后一滴。

化妆︰Midco Chu（吴君如）发型︰Seiko Sin @ Hip Hair Culture（吴君如）服装︰Sacai@Lane Crawford（吴君如）、DIESEL（方中信）