【午夜场】《雷洛传II︰父子情仇》刘德华化老妆演郭富城老窦　

难得两大天王聚头，今日睇呢套《雷洛传II》都算经典。两位饰演父子，刘德华场场都要化老妆，讲句说话都慢番少少，虽然就唔算好神似，但都诚意十足。
不过呢集最好睇系两父子，个阿爸贪污贪到全面系统化，但个仔就考入廉政公署，一个绝对的对立面已经令戏味更浓。

故事第一个精彩位，系佢跟颜同一齐争个油麻地探长呢个油水位，最后由颜同夺得，原以为又输一仗，但原来一哥有新指令，话要增设一个总华探长职位，由雷洛坐上，结果又系骑住颜同。然后自雷洛上任后，重整偏门秩序，各大捞家争相拥戴，声势如日中天；相反颜同则一落千丈，令他对雷洛更加痛恨。

另一卖点系雷洛前妻阿霞（邱淑贞）来港，仲带住个仔陪佢。不过遇著香港要废除一夫多妻制，阿霞唔想影响老公仕途，选择带住个仔去澳大利亚生活，然后当阿仔长大成人后，就回到香港考廉政公署，呢个就系郭富城饰演的雷仲贤。两父子不咬弦就紧，但最感人一幕系阿妈临死，两父子冰释前嫌，临终前做场好戏俾老婆睇，然后仲一齐杀敌。呢幕轮椅枪战都算拍得紧凑，最神奇系两父子可以枪林弹雨下都冇中枪，好运到一个点。