【午夜场】《东京攻略》最爱梁朝伟式的动作喜感

古天乐晋身动作影星，打到飞起。其实梁朝伟都曾经好好打，唔系指《一代宗师》，而系由马楚成执导的《东京攻略》。全片由梁朝伟、郑伊健、陈慧琳挂帅，冇个打得但就以动作片自居，都几大胆。有趣系你睇完又唔会投诉㖞，点解呢？

《东京攻略》不是杜如风教你游东京的那个节目，而系属于2000年，由马楚成执导的电影作品。东京是香港人最爱去的地方，能以该地方定名，实在吸引不少哈日朋友。剧情讲Macy（陈慧琳饰）的日籍未婚夫在结婚当日失踪，伤心之余亦决定飞去东京问个究竟。出发前更遇上帮其未婚夫新屋做装修的设计师毕大勇（郑伊健 饰），称为追讨欠款，要一齐飞日本。去到未婚夫家时，遇上正在调查其未婚夫的私家侦探林贵仁（梁朝伟 饰）。结果就将三人连在一起，而且事件愈揭愈大，仲发现跟日本国家安全有关。

作为动作片，入场睇梁朝伟打好似讲唔通咁，但其实导演都明，所以全片的拍摄都以花巧见称，跳个圈转个身都慢动作，件褛仲要慢慢飘飘下，好鬼有型。至于拳脚功夫，沿用成龙的动作哲学，现场有咩就用咩打，有遮、有梯、有梳化，仲有电动滑板，以及驾快艇驶入东京湾，打唔打得唔紧要，最紧要睇得。更重要系，有梁朝伟式的喜感注入，伟仔的搞笑方式同佢份人一样咁内歛，但就钟意佢冷冷地又笑一笑的感觉。正如片中一幕打完一轮，就去埋怨大家整乱佢个头，仲拎把大梳梳番四正，第二个做就嘘，伟仔做呢，好笑到晕啦！