【午夜场】《恐怖热线之大头怪婴》　冇样你睇但有排你惊

都市传闻是每个鬼故最引人入胜的地方，一句说话传下传下都可以变质啦，更何况是一个故事？传到你耳边时，七除八拆加盐加醋都唔知会变成点。一个电台节目，一个听众来电，就将“大头怪婴”这个传闻传得兴起，人人讲到似层层，后来仲拍成电影，而电影最厉害之处，系你唔会见到大头怪婴个真身，而但你又会好惊。

到底有冇大头怪婴呢件事？冇人知，但成件事就传到真一样，仲要追溯到60年代。事缘当年有位产妇在西区某医院诞下一名怪婴后过身，而这怪婴的怪状在于头，一个比正常婴儿大3倍的头，而且头部长满绉纹同埋眼睛，而且不是发出喊声，而是像野兽般的猛烈叫声，相当恐怖。

俾你系医生，你会点搞？梗系报警啦！结果警方来到就将怪婴运走，并进行研究。你可能会问，发生咁大件事，点会唔知呀！呢个世界有个手续叫封锁消息，唔系美国、北韩先会有，香港都有，香港政府就将呢单新闻封锁，唔俾佢泄露出去引起公众恐慌……传闻系咁讲，我都系咁听。

至于点样被揭发呢？事源有位听众，致电到电台节目《恐怖热线》将事件“爆出”，听众丁生先话自己初中年代，跟7、8名同学在校内踢足球，其中一人大脚一踢，将个波踢到去远处草丛，在执波期间，竟发现一个头颅像竹箩大的小朋友，被困在铁笼内不断发出怪叫。望完都够惊，更惊系事后几位同学们，多年来逐一遇上离奇遭遇，而电影就将呢段疑幻似真的故事拍出来。电影有郑保瑞编剧及执导，又有吴镇宇、何超仪、周丽淇主演，成功营造阴森气氛，纵使睇完成套戏都揾唔到大头怪婴个真身望下，但观众全程都被那团气氛牵住走，愈要惊愈要睇。