临时决斗｜周秀娜王丹妮为陈湛文大打出手　娜姐伤脚需缝针未痊愈

贺岁片《临时决斗》，今日（21/12）去到马鞍山宣传，导演麦启光及主演古天乐负责率领一众，齐齐穿上戏中拳馆“钟磊舍”团服出席，并与现场400位粉丝临时决斗猜皇帝。而戏中两大美女王丹妮及周秀娜，更会为咗陈湛文大打出手，呢个剧情连陈湛文自己听到都唔相信。

陈湛文表示初听到剧情要二女为自己大打一场，感到莫名其妙︰“真系恨都恨唔到，当初接部戏知道王丹妮会演，但唔知娜姐个角色由边个演，一知道系娜姐就哗一声！咁犀利，我㖞！两个大美人为咗我打场交，到底值唔值得呢，要大家拭目以待。”

问到两个要点样入戏，投入地爱陈湛文，周秀娜认真回应︰“我哋一嚟就好爱，我哋系爱到一见面就埋身去打，爱到死去活来。”王丹妮︰“至于系爱到咩地步呢？大家就要入场睇先明。”而二人大打出手一场，更是用尽现场所有道具拍摄，王丹妮︰“我哋会用煎pan、凳，真系打到门都花晒，好暴力。”

而开拍几日，娜姐就不小心受伤，最终更要入院缝5针。“其实拍到后期周身都瘀，已经分唔到边处系特技妆边处系真伤，分唔清。起初要化受伤妆，到后来系要用化妆品遮住啲伤痕。”可见拍摄过程都相当艰辛。