误判｜惊似《毒舌大状》曾拒拍 甄子丹逼张天赋学《导火线》绝技
由甄子丹主演及执导的新作《误判》，锐意来个法庭X动作的新组合，刺激观众视觉。不过当2023年一部《毒舌大状》成为首部票房破亿港片，打后开拍的法庭戏，注定都会被冠上跟风或抄的名衔，“所以起初我系推的。”甄子丹说。
还记得甄子丹当年拍《叶问》（2008），都是在《一代宗师》（2013）宣布开拍多年后，甘冒被指抢饮头啖汤罪名下制作，结果各自拍出一门风格，各自均成为经典。于是再次面对这场逆境波，甄子丹披甲上阵当上导演，由故事、取景、动作到选角都瞓身参与︰“我要揾一个新角度去拍这故事。”（电影上映︰12月21日）
鸣谢
化装︰ 小白（甄子丹）、Tammy Au（MC张天赋）、Will Wong（林家熙）
发型︰Kenji Ng（甄子丹）、Cliff Chan @ Myös（MC张天赋）、Lupus Chiu@O4（林家熙）
造型︰Harry Lam（甄子丹）
服装︰Zegna（甄子丹）
甄子丹︰跟年轻演员合作揾到团火
甄子丹初接这个剧本，见到是法庭题材，的确是有点却步︰“当时百鸣哥揾我系搞紧《导火线》续集，但佢又畀呢个剧本我，我一睇就觉得自己唔系好熟呢个题材，同埋𠮶排大家睇完《毒舌大状》，你部戏又系讲法律，会觉得我哋抄，所以起初是推的。”
来来回回几次后，百鸣最终以诚意打动对方，甄生口头承诺接拍，并担任埋导演，而首要任务是寻找一个新角度去讲这故事，其中一样最重视的是选择演员。“我第一个拣系刘江，揾佢饰演其中一位受害者，我喺网上看到他一个访问，讲自己离开TVB后去到马来西亚发展，因为仲要供个仔读书，都要做落去。我觉得佢呢个态度好硬净，正正符合戏中角色，虽然是受害者，是穷，但仍有一份傲气。第二个就揾MC，之前冇听佢啲歌，但一次食饭朋友介绍下，发现正正系我想揾嘅一个人，有阳光有朝气，又唔好太老正。”
甄子丹︰“同一班年轻人合作，反而我喺大家身上揾到一团火，提醒咗我那份冲劲，无畏无惧，仲有一份好奇，呢样系令到你在片场上得到最真实的演绎。有时跟他们交谈，问下意见，或者会同个故事主线唔啱用，但唔紧要，我照听，仲反思系咪自己执著咗？”
张天赋︰拍动作戏最紧要听话！
张天赋接拍呢套电影前，已经同甄生讲我真系“唔郁得”，但甄生对他就是信心十足，最后还加动作戏给MC。张天赋︰“好在后来得知拍动作片都唔系一嚟就拍，都会对我作出一啲评估，例如对脚可以踢到几高，而且成套动作都已经设计好晒，仲会预先拍咗一个示范畀我睇，所以拍摄过程真系冇想像中咁辛苦，而且非常安全，所以最好的准备工作就是要听话！不过动作戏真系好花时间制作，戏中有一幕动作戏占几分钟，但我就足足拍了两星期，因为实在要有太多嘢配合，是一个很难的镜头。”
林家熙︰被打都系动作一部分
林家熙当初知道要同甄生拍戏，都已经有心理准备，心里更有一股兴奋，可以露两手。“自己一直有做Gym，体能上冇大问题。殊不知原来我系唔使打，只系畀人打，但原来畀人打都唔系咁容易，被打嘅动作都要配合得好先好睇。反而今次角色要多啲处理心理层面，角色去到尾段经历咗好多嘢。更好玩系记得第一日埋位，就拍介绍我出场的情节，因为角色冇角色原型，可以任我发挥，完全放尽去演，然后打后每一幕慢慢去修饰，到最后可以砌出自己到底系个咩人出嚟。”甄生都好欣赏Locker的用心，只是剧情所限未能让他感受打戏，希望下次有机会。Locker听到即打蛇随棍上︰“讲过就系㖞！”
张天赋拍完醒觉要开始操肌
MC在戏中是一位火爆警察，对他而言又是另一份爽感。“火爆呢方面，我谂似我以前多啲，因为入行耐咗，需要学识情绪管理。所以能够在戏中饰演冲动火爆角色都几开心，可以拎自己第二面人格出来畀观众睇。”
今次甄生睇中MC，当然想加以培训，其中有好几幕更将自己的影子注入。张天赋︰“我睇番《导火线》几有感觉，因为我在戏中有招锁脚，我睇番先发现甄生原来在《导火线》有个高级版。我系先铰剪脚再转落地，而甄生版本系先铰剪脚，转完落地再转一下，呢幕真系好似层相识。”
甄生笑指自己那个是怀旧版，但彩排时的确是一心想MC重现《导火线》的场面。“我设计MC𠮶场，本来老板系想我来演，但我觉得个故仔发展落嚟，好似MC打会好睇啲㖞，于是就交畀MC。我就将佢变成《导火线》嘅马军，将我的招牌动作交畀佢，我本来都想佢翻两个滚，但听到佢之后话要开演唱会，咁就变一个滚啦！”虽然系简化版，但出来效果都赏心悦目，绝对见得人。不过MC唯一唔满意系自己身型，“如果早啲知要拍，我就会花时间操肌，呢件事都教识我凡事要做好准备，机会嚟到就把握到，唔好临急抱佛脚。”