梁朝伟获颁博士下个目标想做监制　新戏落实与是枝裕和合作

梁朝伟、洪金宝、许鞍华、杨伟诚博士、阮兆辉教授，今日（5日）一同获香港演艺学院颁授荣誉博士，以表扬各人在演艺界上作出嘅巨大贡献。梁朝伟接受访问时以“好似派成绩表”形容一个月两度获颁奖嘅心情，又透露会食饭庆祝，而之后亦会与家人外出滑雪。

获奖无数嘅伟仔，表示未有认真数过自己到底有几多个奖。问到会唔会教班，梁博士表示自己乐于分享经验，但唔太识教人。“其实而家拍戏都好似读书咁样，基本上每一个角色都要读好多书。”

梁朝伟表示十分满足有博士荣誉，下一个目标系想做监制。“仲系要自己演出埋，希望明年可以实行，因为剧本未写好第一稿，写好又要埋班，最快都明年底。”伟仔透露想监制动作题材的电影，当中包含父女情，最理想的拍摄地点是在日本或韩国，演员暂未有定案，但一定唔会有老婆份。“佢又唔识日文又唔识韩文。（你自己会打？）逃亡、飞车都系动作。”伟仔又表示想请洪金宝大哥合作，但怕请唔起。

梁朝伟又透露已落实与是枝裕和合作，但由于对方剧本仍未准备好。“上年东京电影节已经见过佢，佢有话不如一齐合作拍部戏，点知佢一年都未搞好剧本。”而讲到最近票房大收嘅《破·地狱》，伟仔都话有入场支持。“剧本好好，同埋开心本地电影有返票房，唔系一面倒睇晒荷里活电影，希望可以持续落去。”