黄百鸣《记忆棉》意外大热　早向MC张天赋下战书︰我会唱你嘅歌

早前，网上疯传黄百鸣在大唱MC张天赋的《记忆棉》影片，令大家意外发现百鸣哥再唔系30几年前，在《家有囍事》唱《相逢何必曾相识》的五音不全，而是有板有眼拥有个人特色的“中年好声音”。《香港01》专诚找到黄百鸣做专访，大谈自己的歌唱心得，原来他早就在MC张天赋演唱会后台，已当面下战书︰“我会唱你嘅歌！”至于另一条边打鼓边唱的《爱情陷阱》影片，就是一趟血与汗的成果见证。

自评︰唱得唔好！

影片获疯传，当然是意料之外︰“谂住玩嘅心态，估唔到大家反应咁好。”坊间都大赞百鸣哥唱得有特色，有个人风格，那么自评又如何呢？“唱得唔好！我冇特别去练歌。”事实上黄百鸣一直喜欢唱歌，但他不喜唱卡拉OK，只爱唱Live Band。“我钟意去旧式live band地方唱，唔钟意唱卡拉OK，觉得好被动，要跟住音乐唱，Live Band就唔同，要佢哋跟住我。”

早向MC下战书

唱歌原来是百鸣哥一直以来的最佳减压活动，但因为3年前疫情来袭，不少歌厅都被逼关门，在苦无地方献唱下，谂起自己整番间Band房唱个够。“平时都欢迎大家上嚟夹Band，甚至打完边炉再唱歌都得，钟意唱乜就唱乜。”就是这份随意，唱得好与差大家都不用太介意。

至于点解唱《记忆棉》，事源当时拍摄甄子丹主演的电影《误判》，找了MC饰演一角，后来MC开演唱会都有请百鸣哥去欣赏。“首歌系睇MC演唱会时听到，觉得好好听又唱得好好，我入到后台探班时，仲讲笑话︰‘我会唱你嘅歌！’于是返到Band房问琴师识唔识MC啲歌，佢正正话识一只叫《记忆棉》，我就叫佢弹熟佢，我又返去练熟佢，下次夹Band唱。点知当日琴师病咗，临时揾咗位老人家做替工，他未听过首歌，但都冇所谓，大家志在玩，在大家都练得唔算太熟下，我唱𠮶阵都觉得甩甩地板，但唔理啦，追番就可以。”

参加歌唱比较被叮走

事实上，黄老板年轻时都有参加歌唱比赛，结果一叮成烙印。“当时真系一盆冷水照头淋，自始都冇再唱歌。直至做电影，先参与创作电影歌曲。”在多首电影歌曲中，要数最深刻必然是电影《开心鬼》主题曲。“当时帮我做音乐嘅系林慕德，我叫佢帮我作只主题曲，但佢好忙冇时间叫我先写歌词，我从未试过先有词后有曲，于是又试下。原来又得㖞，因为套戏系我哋拍，故事都系我哋搞，于是填晒套戏嘅主题落去︰‘为人乐观无闭翳 开开心心最栈鬼’结果好听仲Hit咗，所以印象最深。”

至于另一条片，见到黄老板边打鼓边唱《爱情陷阱》，原来都有段故。“冇Band房前我系完全唔识打鼓，到有Band房就觉得打鼓好有型，如果学识边打边唱就好，所以就开始学。起初学极唔识，但我性格就系唔会放弃，于是会一个人返去Band 房，扩音机都未识开，照打无声鼓，将只歌练熟。当然因为《爱情陷阱》这首歌比较熟，可以唔睇歌词都识唱，就揾呢首试下玩下。”

不过这两条片可能会成为绝响。“我冇谂过有人会拍低仲放埋上网，所以自此之后，我拜托大家，嚟唱歌我欢迎，但唔好拍片，可以令大家唱得自由啲，冇咁大压力。”事实上，今次访问前，本想邀请老板再到Band房大展歌喉，但都一一拒绝，看来这半首《记忆棉》大家要好好珍藏起来，日后在记忆棉内想起百鸣哥。