徐天佑爱妻店遭电影公司硬闯拍摄　张继聪：任何硬闯拍摄都唔应该

今日（24/10）张继聪出席电影《里应外合》的首映，日前，徐天佑爱妻Olive Wong在IG控诉有电影公司未经同意下，企图硬闯该分店拍摄，形容行为“同强奸其实冇分别”，事件引起公愤。帖文又指，“本地制作有限公司”正作制作的一套贺岁片。由《喜爱夜蒲》的监制伍健雄执导，由张继聪及阿Sa 蔡卓妍主演。

今晚（24/10）张继聪现身铜锣湾出席电影首映礼，就事件接受《香港01》访问时表示：“其实𠮶日系我第一日拍，当时我同阿Sa（蔡卓妍）花咗好多时间去讨论点样拍，咁所以拍嘅时候我系唔知场地嘅问题，因为演员从来都唔会问制片呢度拍唔拍得，𠮶度拍唔拍得。咁所以拍嘅时候话拍，咪就入去拍啰。而我入去拍嘅时候都有同职员打招呼。因为𠮶个美容院我都有做过Facial。到一路拍嘅时候都冇嘢，到夜晚嘅时候就知道网上就有呢个Po。”

问到拍摄时在店内逗留多久？张继聪︰“都系10分钟左右，其实个镜头系讲我哋出去啫。（在店内有冇职员要求合照？）系冇。（拍嘅过程呢10分钟，职员有冇话唔拍得？）咁又冇㖞。到出到街我哋又继续拍。（硬闯如属实，你觉得啱唔啱？）我谂任何硬闯拍摄都唔应该。嗱呢个就系喇，我作为一个演员好难问电影公司，我哋系咪硬闯。其实件事发生咗之后，多咗好多人讨论呢件事，变咗我就夹喺中间，而另外𠮶边都系我朋友，亦都唔了解成件事，坦白讲如果我一早知系咁，就唔会发生。你话呢件事系咪有人处理得唔好，我觉得呢个人系要自己处理返。（事后有冇同徐天佑沟通？）我哋有短讯联络。我觉得呢件事唔系我哋两个明白就可以处理好，因为呢间店系佢太太。”