暗花｜郑保瑞爆未有剧本照开工拍 关键在刘青云个袋︰入面装咩？
YouTuber Ming Jai最新的频道节目《捞编》，找来电影工作者，一齐倾倾香港编剧工作。而第一集就有影帝林家栋、导演郑保瑞及吴炜伦。几位既分享担任编剧工作的经历，亦披露行内一些鲜为人知的趣闻。好似Ming Jai问到一部戏要开工，系咪冇剧本就一定开唔成呢？拍过不少电影作品，新作《九龙城寨之围城》票房更破亿的郑保瑞就坦言︰“唔一定有剧本！”
冇剧本都开到工？
“冇剧本都开到工”，听落好不合理，会幻想最终会拍下很多多余的素材，浪费时间。但从事电影工作多年的郑保瑞，就有这方面的见闻和经历。郑保瑞︰“只系讲开工，唔使完成整部戏的话，系可以嘅！未有剧本开住工一个星期都可以。我听闻当日拍《暗花》（杜琪峰导演）因为要就档期，点都要开工喇，于是就去咗澳门拍一个星期，拍完一堆镜头返嚟先去度番个故仔，然后再谂到底刘青云个袋入面装啲咩？杜生就系要求有个袋，入面装咩呢？未谂到。”
是否有个袋就安心一点，可能是。因为到郑保瑞拍《杀破狼II》时，便遇上同一情况。“根本未度通就要拍，拍了一星期左右就要先拍Ending，中间会发生咩事都未知。吴京问︰‘导演，我要带住啲咩？’我话︰‘带住个背囊啦？’吴京追问︰‘做咩要带住个背囊？’好似要拎啲嘢，至于系咩我未知，点都拎咗先，会唔会系件武器呢？就要一边拍一边去到泰国再慢慢度到通为止，所以的确会有这些情况。”
不过郑保瑞强调，冇一个导演系无原因下，纯粹话拍嚟玩下就走去开工先。“去到呢个情况多数都被逼，可能因为演员档期在手，或者想开机拍一些场面让大家感受下，攞份感觉都有可能。”
戏服唔连场要加戏
吴炜伦则表示，这一招可以用，但要睇导演同编剧有几高手，低手一定做唔到。“我听过《野兽刑警》都系一边拍一边度，由副导演在事后砌番个分场出嚟。其中有场戏讲秋生和耀扬去桑拿，一齐分享做警察和古惑仔的心态。我觉得好好睇，有次问番陈庆嘉原来本身冇这场戏，系因为砌完时序出嚟，发现前一场同后一场戏套衫唔同咗连唔到，于是度场桑拿入去。”
虽然吴导都质疑平常人去完桑拿都系著番同一套衫走，点会换咗衫？但陈庆嘉就捉到观众心理，银幕上见几位演员除晒衫，到下个镜头完全唔同衫都冇所谓。“编剧好玩就是这些地方。”吴炜伦说。