玩转脑朋友｜网民推变《溏心风暴》版 李司棋关菊英做硬阿愁阿乐
撰文： 许育民
出版：更新：
迪士尼与彼思的动画《玩转脑朋友２》（Inside Out 2），上映以来，观众反应热烈，今个星期更有谢票场，票房势必再创高峰。不过自从司棋姐李司棋扮完阿愁之后，激发起网民联想到如果要拍一部《玩转脑朋友之溏心风暴》，到底可以点选角呢？
李司棋演阿愁
因为有网民话司棋姐戴粗框镜个样好似阿愁，令司棋姐都不时会扮嚟同大家玩下，《玩转脑朋友2》上画前，就上载一张同阿愁合照，根本系真人版，唔揾佢做唔知可以揾边个。
关菊英演阿乐
计在《溏心风暴》第一集个角色，菊姐一啲都唔乐，介乎阿燥同阿憎的混合体，不过以其短发造型，又真系同阿乐好夹，而且动画中，阿乐同阿愁都成日要并肩作战，两位做最适合。
米雪演阿憎
以米雪姐在《溏心风暴之家好月圆》中的造型，其实更似《超人特工队》的E夫人，不过在剧中性格怨恨心重，做阿憎最适合不过。不过都有网民觉得由第二集攞女杨怡（杨尧茜）饰演，性格都一样啱晒。
阿燥有得争
虽然剧中夏雨成日都笑骑骑，不过佢发起恶嚟都唔系讲笑，演阿燥都一流。而另一人选就系昌哥李成昌，虽然剧中佢系蛊惑居多，只系一发起难渣上嚟都唔系人咁品。当然，如果可以由许绍雄做番就最好啦。
琴姐最啱念旧姐
而新角色念旧姐都好多人钟意，呢个元老级角色，当然以琴姐李香琴系不二之选，无论年纪同造型都好似。可惜琴姐已离开大家，亦成为大家心中的念旧姐。