玩转脑朋友2｜戏院打卡椅套被偷走　网民变阿燥怒斥冇品︰自私L

彼思动画《玩转脑朋友2》（Inside Out 2）将于7月11日上画，上星期一连几日举行优先场，等大家可以第一时间欣赏电影。优先场朋友除会获赠海报等纪念品，部份院线更作特别布置，全院都笠上“脑朋友”椅套，等大家睇戏前后都可以打卡。不过有戏院就在社交平台表示被观众偷走了椅套，令现场零零丁丁少咁个，并呼吁当事人将椅套归还。

事发于英皇院线，时代广场戏院，网页小编昨日出贴文，一来就阿愁上身︰“呜呜😭都话咗小编阿愁上身㗎啦... 啱啱发现有位“脑友”唔见咗… 焦虑嘅小编阿焦已经睇紧CCTV🚨所以请喺我变身做阿燥之前😡将椅套归还啦🙏🏻”

从字里行间睇到，小编其实都阿燥冒头中，但都极力隐藏，仲阿乐上身呼吁︰“大家要爱惜展品，钟意就影多几张靓相留念📸 记得tag返我哋呀😉”最后再P.S.多一句︰“ 再手多多的话～下次就争取唔到咁靓嘅打卡位比（畀）大家影相㗎啦”

贴文一出，不少网民就留言直斥行为要不得︰“啲人贪心，报警拉佢！”、“上carousell睇下有无人卖，应该会捉到”、“佢偷咗阿燥，而家真系唔方唔燥”、“自私L”。不过据院线通知，贴文出街后翌日，已有人自动将椅套归还，未知系当事人物归原主还是代人处理，总之集齐番一众脑朋友就开心喇！

不过昨日（2/7）傍晚时份，戏院小编分享阿燥顺利归队之际，又到英皇戏院康城分院“走失”阿乐，似乎不少人都对呢批椅套虎视眈眈。不过希望大家有公德心，打张卡靓下就算，唔好拎走，搞到下一手入场“百中冇一”就唔好啦！