鲜浪潮｜不获艺发局资助望顶到80岁　杜琪峰︰讲都冇用，佢唔会改

《第十八届鲜浪潮国际短片节本地竞赛颁奖礼》今日（29/6）假高先电影院举行，向参赛者颁发“最受观众欢迎奖”、“特别表扬”、“最佳摄影”、“最佳编剧”、“最佳导演”及“鲜浪潮大奖”。鲜浪潮电影节有限公司主席杜琪峰先生都有出席。“鲜浪潮”一直以孕育本地新导演为己任，18年来成功提拔多位新导演，不过活动自去年开始，不获艺发局资助。身为主席杜琪峰在开幕前发表演说：“如果我还在香港，我一定会支持鲜浪潮。我今年69岁，明年70岁，如果我命长啲、顶得到的，希望顶到80岁。”

“我都用过低成本去拍戏，唔系钱可以埋没你的才华”

事后杜琪峰接受传媒访问，问到不获资助一事，表示冇乜所谓︰“做到就做，做唔到就话畀大家听做唔到。”由于鲜浪潮会资助每位参赛者一定金额作拍摄资金，故失去资助后，今年入围的短片数量由昔日的十多部减至８部。

杜琪峰︰“今年特别艰辛，好多人都想参加，但我哋能力所限，尽量悭，所有嘢都悭，我都知政府有啲地方可以畀到好多钱去做，各有各做啦，亦都希望来参加嘅小朋友唔好介意𠮶小小钱，我自己都用过好低成本去拍戏，唔系钱可以埋没你的才华，特别系电影呢个行业，系要信自己。”杜Sir亦赞今年作品水平提升︰“可能少咗队伍，前期拣选剧本严谨啲，虽然成品唔算好突出，但有心机。”

“咩人钟意做咩事，唔好讲咁明”

其实由近两年开始，鲜浪潮已不获艺发局资助，据杜Sir讲金额达数百万一年，“而家冇咗就好掹掹紧，Office都就嚟冇，不过呢个世界冇office都得，最紧要所有委员系咪有心帮手。我哋几乎司仪都唔想请，你得就你去做。”

问到当局如何回复点解不获资助？“佢话你哋自己搞得掂啦。（记︰你自己讲搞得掂？）我点会话自己掂？我从来都未掂过！唔紧要，事情的上上落落必然有，上帝会有安排。”杜Sir亦指没有再去追问︰“咩人钟意做咩事，唔好讲咁明，个世界就系咁，顺流逆流。讲都冇用，佢唔会改，你唔需要Challenge（挑战）佢，你只需要好好地为自己做嘢。呢度做唔到就去第二度做，冇所谓。”

“唔好以为呢个世界做好事就有好报”

虽然杜Sir承诺会继续支持鲜浪潮，亦预期要继续扑水︰“仲会被人藐你嘴。（记︰18年来成绩有目共睹都被藐嘴，有否觉得感慨？）一定，你唔好以为呢个世界做好事就有好报，冇㗎！你记住呢个世界唔系，善良嘅人未必得到善报，恶𠮶个都未必好过，一样！你明白老子多啲就会明。”

问到这么艰辛，为何仍坚持下去？杜Sir觉得香港电影业是需要承传。“香港电影的确在世界上有好大成就，因为社会转变，市场转变，本土电影开始冇咗。我们拥有这么长历史，有几好根基，就咁丢咗去又好似……话晒以前有班人都好努力为香港打拼过，好多电影都去到世界各地，现在应该由我们这班比较资深的工作者，提供一些平台去支持后辈，亦是电影人应尽的责任。”

《第十八届鲜浪潮国际短片节本地竞赛颁奖礼》得奖名单：

鲜浪潮大奖︰《鬼妹》 林慧姸
最佳导演︰ 《黑羊》 曾杨
最佳编剧︰《鬼妹》 林慧姸
最佳摄影︰《极乐》 李昊
特别表扬奖︰《眩光》 钟易澄
最受观众欢迎奖︰《眩光》 钟易澄