谈判专家｜吴镇宇不介意参与谢票 “但唔系用呢个方法推动票房”
由邱礼涛执导，刘青云、吴镇宇主演，彭秀慧客串演出的电影《谈判专家》，上映两星期以来已录得$1,600万票房，成绩相当不错。故向来甚少现身谢票的吴镇宇，都联同彭秀慧破天荒出席昨日（28/6）谢票场。当传媒问到镇宇为何甚少谢票，他就有自己一套理论分享。
“冇得一嚟就用谢票去抢票房”
其实镇宇都并非甚少谢票，他回想在《逆流大叔》上映时，谢票就如返工一样，不断去旺角场谢票，一有时间就去。当时觉得套戏好，希望尽量带多啲观众入场。问到谢票会否比拍戏辛苦？镇宇就答得坦白︰“的确系辛苦过拍戏，同埋系冇Point，因为一部电影要成功，先去答谢观众，冇得一嚟就用谢票去抢票房，要系有票房先去答谢人，唔系用呢个方法去推动票房。”
问到《谈判专家》票房快将达2000万，会否再出来谢票？吴镇宇︰“其实呢……我哋好忙㗎，我哋唔敢随便应承。我真系一别之后要3个月先返屋企，我个行李系大到搭唔到高铁，真系要3个月后9月中才返到。”对于曾当导演的彭秀慧，对谢票又有另一见解︰“我用导演身份，真系想多谢入场的观众，同埋有机会同观众对话，感受到大家的反应，有机会再讲多啲戏以外的故事。”
至于会否台前幕后食饭聚一聚？镇宇︰“邱导都走咗，你叫埋邱导嘛，佢仲忙过我哋做演员。好厉害，一个戏院有两部佢嘅作品同时上映，头先争啲畀人拉去《海关》（海关战线）度谢住先。”
做唔做刘德华老婆？做！
导演彭秀慧今次以演员身份参与，更有幸演“刘德华老婆”，一对神经失常的夫妻。在谢票期间镇宇搞笑地问︰“剧组系咪问你有冇兴趣做刘德华老婆呀？然后你就答︰做呀！”彭秀慧都承认是爽快应承，直至见到服装才知甚么一回事。“不过作为演员真系咩角色都要演，无所谓。我私底下都系呢个造型，只系大家比较少见。同埋同刘德华演戏有个好处，无论角色大与小，都一定唔会畀人剪走。”
而戏中更被华仔锡额头，这举动又是否临时加戏？彭秀慧︰“𠮶刻的确响起《天若有情》音乐，但我又冇乜紧张，因为一直都识刘生，感觉大家都好放心去演。锡额头呢下的确冇特别去倾，睇番原来都几浪漫。”镇宇都对于这场戏的谈判技巧特别深刻︰“有人指呢场戏冇乜谈判技巧，其实要同一个癫嘅人讲嘢系好困难，叫到佢食饭，同会自动畀番饭钱你，从呢啲小动静就可以推测到对方性格。”
结尾一句搞笑得嚟有特别意义
至于结尾，镇宇以一句“南亚裔好需要你”来笑刘青云，他就笑指是专程留到Ending才拍。“我等佢一个唔留意，Ending一刻先𡁻佢，等佢冇机会报仇，佢当时仲嗌导演，话𠮶阵时（故事发生在90年代）有冇南亚裔呢个用字，我话你咪理啦！”
虽然呢句说话似玩票居多，但镇宇觉得故事发展到最后，正好要以一句对白去表达二人的友谊加深。镇宇︰“你点样睇到两个人嘅友谊，就系我去讲呢个人一啲嘢，佢都唔介意，就知呢两个系好朋友。呢句说话就好似我笃一笃佢，佢又唔介意，就似一股神奇力量展开呢段友谊。”原来导演邱礼涛拍摄时，都觉得争一句令观众知道二人会做到好朋友的对白，“呢句在公在私都可以用，好有效果。”镇宇说。