玩转脑朋友2｜王菀之要重拾9年前把声 Ivy So︰我私底下系阿焦
相隔9年，新一集《玩转脑朋友2》（Inside out 2）终于来到，香港将于7月11日上画，令人万众期待。讲到广东版配音，上一集已参与声演阿愁的王菀之（Ivana），蒋志光（阿惊）、许绍雄（阿燥）、“虾头”杨诗敏（阿憎）。而今次《香港01》的专访，除了有王菀之，仲有新上阵，声演阿乐的COLLAR成员苏雅琳（Ivy），新来的“脑朋友”，就有黄正宜（阿正）声演阿焦、丽英声演阿羡、张蔓姿（Gigi）声演阿厌。同大家讲到配音趣事，仲分享自己同个角色有几似。
9年前的我做紧……
电影《玩转脑朋友》于2015年上画，回到9年前，5位都在不同岗位，不同经历，而相同的就是都有各自的体验，就同电影中的韦莉一样，一起成长。王菀之︰“起初我以为系一部畀小朋友睇嘅动画，但后来发现当中有笑有喊，对已成长嘅人嚟讲都有唔少童年回忆，甚至会谂番自己性格系咪咁，脑入面系咪都有呢5个脑朋友住喺入面呢？”
Ivy So︰“9年前我14岁。”全场哗然！“哈哈……当年未有入场睇，系大个先睇番，记得当年已经好多同学仔讨论，最深印象系入面拍摄梦境嘅地方，真系好似自己平时发梦的情景。”
阿正︰“9年前我都读紧书，我系大学last year，差不多出社会工作，对每个人嚟讲都系一个好多挣扎嘅岁数。抱住呢种咁复杂情感，去欣赏呢部戏系几中我。而我最欣赏电影，可以将一个咁复杂嘅概念形象化，所以当年已经好喜欢这部动画。”
Gigi︰“当年睇完戏，会不停反思自己系咩情绪主导多，之前唔会咁谂，自己又点样同不同嘅情绪共存，所以部戏系好适合大人同小朋友一齐睇，有种好神奇的感觉。”丽英︰“当时预备紧DSE，心情好复杂，好多不同的情绪涌现，所以对女主角韦莉喊一幕系好深刻，以前觉得做人最紧要开开心心，冇咩事都唔好喊，但睇完先发觉有啲情绪都系需要释放出嚟。”
所配角色就系自己？
自从王菀之配完阿愁，大家总觉得她就是有份独特的愁善感，入型入格，就连Ivana自己都觉得系。“我记得刚刚配完，有朋友唔知，反问把声真系你配呀？而更熟悉我嘅朋友，就会觉得呢个角色根本就系佢。我唔系一个成日都对自己有信心嘅人，凡事都会谂下自己有冇能力做到，其实阿愁嘅特质系几似自己，最终决定咗去做就一定会做到。”
至于Ivy So，大家眼中的她都是乐天开朗，但原来这只是她表面予人的感觉。Ivy So︰“阿乐角色同Ivy形象几似，但我私下其实好少会表现到咁开心，我反而会几似阿焦，好容易因为工作上的事情而焦虑，所以为呢个角色配音都系好事，发觉自己原来都可以再开心多啲。”
来到阿正，她就觉得自己同阿焦perfect match，包括埋个样。“我本身同阿焦个样系极似，都系有啲喜感。我第一次去casting，一见到阿焦就觉得好肯定系我本人嘅性格。虽然我平时好似好开心，但私底下系好心急同不断谂嘢，呢个方面系极似。”
Gigi同丽英分别配阿厌同阿羡，两位都觉得点解由身形到性格都可以咁似？Gigi︰“Casting时超开心，觉得角色好有型，首先佢非常高瘦啦，又经常摊在梳化，我同佢最似系人生态度都一样咁chill，好多事情发生事时，我都以观察者身份参与，比较唔出声，只做自己嘅嘢。”丽英︰“我同阿羡体型非常似，都系细细粒，又经常会羡慕人同附和人，在戏中我就成日附和阿焦。”
配音时最触动一刻
《玩转脑朋友》不乏感动情节，问到5位今次配音过程中，最感动又是那个时刻？丽英︰“我唔系感动，系最离谱，因为阿羡在戏中第一句开场白，就已经系我经常讲嘅一句说话，大家入场睇就知。”Gigi︰“阿厌同我一样，回应人时都系好精简一个字︰‘呀~’，我覆朋友都系好简单咁覆一粒单字，所以呢方面同佢好相似。”
Ivy So︰“我系花咗唔少时间睇番第一集配音版，尝试去模仿，基本上套戏讲一句，我又会跟住讲一句，完全专心唔到睇剧情。不断系咁似，去到配音要花好长时间去讲清楚每句对白，比起平时演戏讲对白好唔同。”阿正︰“阿焦嘅逻辑同我好似，佢好钟意将一啲事情FF到无限远，好似我咁，假设今日同Jeffrey（魏浚笙）食咗餐饭，期间佢唔小心接触到我，我就会联想到佢系咪主动摸我，佢系咪对我有意思？如果真系有意思，将来拍拖系咪要夜晚冇人先拍得？生仔生3个够唔够呢？会谂到好远，所以今次系有少少本色演出。”
跟几位不一样，今次是王菀之第二次配阿愁，那份愁善感又特别浓厚。“我以为要花好多时间揾番9年前把声，希望揾番9年前同阿愁互通嘅感觉，但一入到配音室，见到戏中画面，自己就快跌入呢个世界，就好似见番一班脑朋友嘅老朋友一样。我好珍惜可以同佢再一次合体的机会。”