专访｜林雪被剧情触动哽咽谈子女　“一家之主唔系拎钱返去就得”

古天乐有份监制的动画电影《加菲猫︰勇闯世界》，粤语版找来林雪及麦沛东，分别声演一对父子。接受访问前有机会先睹为快，正当以为林雪会贯彻地以乡音放题宴客，意外地画中的林雪字正腔圆，感觉如另一人。正当访问第一个问题要赞雪哥配得认真时，冷不防他脸上表情严肃起来。原来因为戏中父子相处的情节，正正刺中雪哥内心对子女的愧疚，而通过这部戏正好让他重拾自我，重新地当一次爸爸。

鸣谢︰
发型︰ Louis Tse@Number8 Salon（麦沛东 ）
化妆︰Yannis Yip（麦沛东 ）
场地提供︰The Mira Hong Kong

走乡音唔好教坏细路

标志性的乡音向来是雪哥卖点，但当知道要配一部合家欢动画时，林雪自觉要对得住小朋友，不可教坏细路。“小朋友系我哋嘅将来，我要尽力改咗自己啲乡音，一次唔得配够两次，配到得为止。”要对小朋友负责是动力之一，更大动力是来自戏中的父子情，故事讲到加菲猫跟爸爸由误解到破镜重圆，中间经历了不少障碍，这一切正正令林雪身同感受。

林雪︰“其实我好想多谢呢部动画的监制古天乐先生，我哋相识在峨嵋山（拍摄《百年好合》），今次叫我配这部卡通片，畀我第二次重生，通过呢部戏我Feel到好多嘢。”

最令雪哥感受至深是因为戏中情节，令他想到对子女的亏欠。“因为工作忙碌，自己冇重视小朋友成长，我知呢啲系借口嚟。当我配音时，正正触动我内心最脆弱地方。爸爸系一家之主，但一家之主唔系讲就得，系要去做，要做好你做主嘅每一样事情，包括最细微嘅陪伴小朋友，一家之主唔系拎钱返屋企就得，我可以同你讲，钱真系唔系万能，一讲到呢度就所有嘢都付诸流水。”

疫情3年挽回亲情

原来雪哥曾经因为与小朋友少沟通，导致大家有所误会。大女今年已27岁，细仔24岁，一心以为都长大成人，任何挽救方案都于是无补，殊不知一个疫情，就令雪哥有意外收获。“好在呢3年疫情，唔出家唔出门，令我培养番同小朋友相处嘅感觉。工作系少咗，但陪伴小朋友时间多咗，以前要做嘅事，呢三年来冇停过。”

而今集《加菲猫︰勇闯世界》，正正是讲两父子的误会，拍者无心，配者有意，林雪在配音过程中感慨良多。“配得好辛苦，去到某个位已经唔知点配，好在配音导演不停提我，我真系入咗戏，当正系自己，佢要我抽离自己，做番只猫。”

放低无谓尊严

戏中破镜方法，有待大家入场观看在此不剧透，但问到林雪，他坦言只得一个方法︰“你要放低无谓嘅尊严，只要小朋友尊重你，你自自然然就有尊严，所以你要放低少少嘢，先可以拎番你应得嘅。你之前少畀咗，今时今日就要加倍付出，其实始终补偿番，裂咗就系有裂痕，冇得重圆，但起码要佢哋明白，到佢哋再有小朋友时知道点去做，唔好等佢又有裂痕。”

难得误会多年，有机会修补，今年7月便踏入60岁的林雪，坦言要把握机会︰“我同自己讲，我就好似由1岁开始重生，自己做番小朋友，同小朋友倾偈。而家好好，起码佢哋接受咗我，嚟紧仲会帮我准备父亲节大餐。”纵使访问期间，雪哥一直架起墨镜，但泪水仍是渗出眼眶，由面颊反映出光。“我喊系开心嘅喊。”林雪道。

麦沛东︰有个盲撑我嘅爸爸

林雪以父亲身份道出两代的沟通，刚好麦沛东就是儿子的角度看与爸爸的关系。年前麦东新婚，两口子自此搬出去住，既当上一家之主，又跟父母相处时间少了，以前看似必然的亲情，原来都要用心经营。

麦沛东︰“我同爸爸以前都唔多讲嘢，我系一返到屋企，佢问一句︰‘食咗饭未呀？’我答食咗就入房𠮶只，一直都冇乜沟通。就算当时我读演艺学院，佢都唔系好知我读咩。”

虽然唔清楚个仔读紧乜，但只要儿子邀请自己去看表演，都定必出席，拍掌亦必拍得最大声。“佢每次嚟睇我表演都好支持，谢幕时拍得最大声就系我爸爸，然后在观众席上嗌好睇呀！好好睇呀！佢系好盲目支持我嘅。”

爱父母，要让父母知

大半年前，麦东爸爸跌亲，而且撞亲脑部，向来乐观派的他，为免儿子担心，一直话自己冇事冇事！麦沛东︰“但医院回复我哋话至少要住3日院，正常听到要留院3日，小事极都有限，后尾仲见有血喺耳仔流出嚟。我当时好紧张，但又要排紧舞台剧，一排完就即刻去揾佢，后来佢静静问我太太︰‘佢好担心我咩？’其实父母对仔女嘅爱，要畀仔女知，仔女对父母嘅爱都要畀父母知。责任唔一定在父母那边，系双方，做仔女嘅都要体谅父母。”