一个字头的诞生｜刘青云从影最辛苦 吴镇宇︰成车汽油一通电就爆
因为将上画的电影《谈判专家》，令两位好戏之人刘青云及吴镇宇相隔19年再次聚首，两位在90年代拍过不少经典作品，其中最为人津津乐道是银河映像的创业作《一个字头的诞生》。电影上画时毁誉参半，甚至徘徊烂片边缘，但多年后终被平反，被奉成韦家辉导演的经典，更因为版权问题一直未见修复版，每次戏院重映都必定满座。不过对于两位演员来说，《一个字头的诞生》是一场恶梦，刘青云更斩钉截铁地说︰“系我从影以嚟最辛苦嘅一部电影，仲辛苦过拍《十万火急》。”仲辛苦过《十万火急》？到底辛苦喺边？
由杜琪峰监制、韦家辉执导的银河映像创业作《一个字头的诞生》，要求就是创新不要重复。而《一个字头的诞生》的故事陈述，源于刘青云在戏中一个决定，将衍生出两个结局，韦家辉就将两个结局拍晒畀大家睇。呢样都未算辛苦之处，最辛苦是韦生要求不少场面，都以长镜头一Take过拍摄，包括大型的动作场面。
青云︰拍得3、4个take，啲火就嚟喇！
刘青云：“《一个字头的诞生》系我从影以嚟最辛苦嘅一部电影，仲辛苦过《十万火急》我觉得。《十万火急》危险得嚟因为有好多化学物品，每日都系拍一个镜头，但《一个字头》嘅辛苦系你根本唔知点算。一场戏、一堆人，一个镜头直落。一大班人打，用Wide Angle拍，镜头一转过嚟万一有个人迟咗，唔生性，所有嘢都要重头嚟过。你谂下大家拍得3、4个take，啲火就嚟喇！（眼尾示意吴镇宇）。”
吴镇宇都相当同意，而他亦以“毕生难忘”来形容戏中一场鱼塘没顶戏。“当日拍完通宵，我哋去到元朗一个地方，要喺鱼塘扮浮泥，一路慢慢没顶演出。但你知唔知鱼塘啲水有几深，原来得咁多（及腰部分），浸你唔死，于是你就要摊晒落去，要嗌住哎呀！哎呀！瞓晒落去，然后仲要伸只手嚟，没顶！6条友！”
由于用长镜头拍摄，只要有一个人节奏唔啱，或者未做到一致，就要再嚟过。当然吴镇宇呢刻都会火起︰“X！边个，系咁揾！然后要上去冲水，由干到湿再嚟多次。你知鱼塘即系条鱼生养死葬乜叉都喺度，好似都拍成３、4次，大家都已经唔在乎鱼塘有几难顶，快啲拍完返屋企。好彩讲徐锦江呢幕‘香’咗（编按︰其实仍在生），唔系佢一定完成唔到㗎！佢人又笨又够高，咁你点样没顶呢？所以平时徐锦江成日累我哋NG。”
镇宇︰吓？！X你老X，呢镬嘢我哋唔死？
另外有场戏讲邹凯光为要毁尸灭迹，讲到未待几位落晒车就点火烧车大爆炸，拍摄时吴镇宇见到成车都系电油，足足三大袋，而最令佢担心系剧组安排以无线电点火……吴镇宇︰“我上到车，见到车上一袋袋紫色嘅嘢，喺灯光下闪嚟闪去，系三大袋汽油，原来汽油系紫色，因为从来未见过咁大袋。”
镇字忆述之前拍戏，使用无线电引爆时，的确会因为一个来电，触发讯号引爆。“真系㗎！有次个工作人员喺现场突然嗌︰‘哎呀！’我问咩事？‘佢问边个打电话？’我话吓？！X你老X，呢镬嘢我哋唔死？大佬，大家喺架车度倾倾下偈，然后突然嘭一声！冇喇㖞。”
刘青云都补充一句︰“电影界就会喺𠮶阵玩完！”镇宇︰“系喇，咁就唔会有青黄不接啦，呢班人爆晒都要捧班人上嚟啦，一定有新人啦！”镇宇为求可安心演出，于是要求剧组人员先分开驳线，待大家走开才插线引爆。
上弹枪指住自己个头
刘青云：“另外拍有场戏，有个阿叔揸住支枪，上咗弹，上已膛指著我，呢幕设计系佢讲对白，讲完我就缩低佢就连开几枪。负责枪械的同事已经望实，我亦同阿叔讲：“阿叔，好简单啫，你只要只手指唔好放喺掹鸡度，因为你一放上去，你一激动就会掹鸡。所以我一直都望实佢，见佢手指一郁，我就嗌住佢：‘阿叔！阿叔！阿叔！’佢就覆我︰‘对！对！对！’因为真系会，只要情绪一激动就会打。”
全片就是在一种充满未知数下完成，虽然当日上画不获认同，但至今已成为经典，而最终银河映像亦正如其戏名及剧情一样，在跌跌踫踫中，为自己建立出别竖一帜的字头。