吴慷仁笑袁澧林人未到外卖先到　Angela尴尬肥咗︰对大髀好恐怖

香港家庭温情电影《但愿人长久》，由新晋导演祝紫嫣自编自导自演，台湾演员吴慷仁、袁澧林（Angela）、谢咏欣、许恩怡及朱栢康等主演。电影今日（9日）举行首映礼，监制李骏硕与祝紫嫣携同吴慷仁与“六位女儿”亮相，吴慷仁难得与六位饰演女儿的演员重聚，在首映上笑言非常嘈吵，一众演员自煞科至今仍然感情要好，气氛依旧热闹。

吴慷仁与戏中饰演年长版“子缺”的袁澧林，于首映上接受传媒访问，吴慷仁谈到热闹嘈吵的声浪时笑言不介意：“佢哋开心就好，难得可以返埋一齐，好耐冇见过！周琳（戏中饰演太太）都好耐冇见，睇到佢瘦好多、变得非常靓！”

提到拍摄的深刻回忆，吴慷仁则分享指：“我都记得第一次喺监狱，我睇到佢嘅表演真系好想喊出嚟，但系我唔得！”并形容当时袁澧林的表情：“我睇到佢眼睛红红哋，我真系心谂‘妳唔好喊出嚟呀！’我也会哭出来，所以我跟她工作嫌场次太少，想要好好跟她拍一部戏（普通话）。”

袁澧林最有印象的拍摄回忆，则是吴慷仁为角色断食减重：“我记得拍𠮶时慷仁冇食嘢一段时间，呢套戏有排戏嘅环节，香港戏比较少见、我自己经验都唔系好多，我哋完咗会一齐食大餐同埋打麻将。咁慷仁就负责打、唔食嘢。”吴慷仁随即笑指：“佢负责食、都会打，但主要负责食。”

吴慷仁更大爆Angela私下饮食习惯：“佢犀利嘅地方系佢去到边，嘢食会先到。人未到嘢食先到！”袁澧林则怕丑表示：“我成日都较定时间嗌定嘢食先，有一次个外卖早到过我，就好尴尬！”谈起饮食，袁澧林亦自爆：“其实我去台湾几个月肥咗好多！唔可以再肥落去喇！我肥咗七磅，我已经戒咗一个月甜嘅嘢饮，因为都紧接住工作，本身对大髀真系好恐怖！真系好惊！”但袁澧林今日现身首映时，身型依然修长苗条，丝毫没有走样！

至于未来合作机会，吴慷仁笑言不想与袁澧林饰演情侣：“唔需要做情侣啦，我做哥哥就好喇！都有啲岁数差距。”袁澧林识做大赞：“唔系呀，你仲系好靓仔！”然而被吴慷仁当众“拒绝”演情侣，袁澧林亦笑言没有心碎：“冇！睇下角色啰！”

本周日将会举行“第42届香港电影金像奖”，凭《但愿人长久》入围“最佳男配角”的吴慷仁继续表示没有信心得奖：“冇！志在参加！好高兴、好兴奋！希望可以见到好多钟意嘅导演，好想同佢哋Selfie！例如谢君豪大哥！我见到他一定跟他好好打招呼，还有其他演员，因为我都唔知有几多人嚟，但系睇到一定识。”至于近日台湾经历强烈地震，吴慷仁亦感谢香港人对台湾的关心：“台湾现在慢慢在恢复当中，谢谢大家对台湾的关心跟资助。今年是多事之春，希望不会有人再受到伤害，希望灾难不要继续降临，让我们喘口气，好好的生活，回归平静。”