【来稿．HR人回应诗宁】见一次工就知伏唔伏？小心冇咗份好工

每间公司／部门嘅文化同生态都好复杂，要喺咁短时间充份了解一间公司有几伏，机会其实唔算高，错误解读仲分分钟令你失去一份好工。

文：拾陆

作为HR从业员，好多时拜读诗宁小姐有关职场嘅文章，都别有一番感受。当然，文章基本上都以求职者身分出发，再加上都系个人经历个人感受，同意又好唔同意都好，其实就好似键盘战士大战五毛党，老老实实冇嘢好拗。不过睇咗咁多篇，我谂如果有多一个从公司或者HR角度出发嘅观点，可能都几有趣。

就以近日一篇《如何在见工过程，洞悉份工伏唔伏》为例，题目写得好，如果见工已知份工伏唔伏，各位施主识得回头是岸唔好嘥大家时间，更加唔使落咗搭先再烦走唔走，的确系功德无量！不过究竟如何洞悉，不如我哋先回顾一下几个小锦囊：

（一）把握同HR小薯独处时间，收收风

一般嚟讲，畀得表你填嘅，的确系小薯，分分钟仲要系小小薯（甚至系Receptionist），而佢哋多数放低份Form同电话攞完你啲Cert就走，如果仲要佢同你吹水搭讪几分钟到十几分钟……可能要你有返咁上下靓仔靓女先掂，再者佢哋啲风有几指标性，相信真系见仁见智。

另外一个温馨提示，如果个HR约你临Lunch先上去，佢应该都真系文中提及𠮶种“蠢嘅HR”，多倾无益。

（二）对住HR阿姐／阿哥要单刀直入（职业病，戴定个头盔加返“阿哥”，唔怕人告我歧视）

讲到呢个Point，首先要更正啲嘢，虽然各处乡村各处例，但有唔少公司都系HR见先。如果你撞中啲interviewer见人如工厂啤工，见个面问几句交咗功课就礼成，恭喜你！因为你可以轻轻松松过一关。不过市面上有唔少interviewer着紧自己个专业同责任，仲会认真处理应征者，如果佢唔钟意你，你应该连见team head嘅机会都冇，所以畀着我，HR𠮶关点都要小心应对。再者，一个唔该佢睇中你，分分钟仲可以帮你喺team head面前美言几句，加定啲印象分。

而文章中讲得好啱嘅系，HR的确都会“了解下你背景、过往薪酬福利、点解转工、性格适唔适合公司文化同职位要求”。点解呢？因为除咗背景资料不可少嘅原则外，应征者嘅答案以及佢作答嘅方式同取向，其实仲畀紧好多有用嘅资讯我哋去分析究竟佢系一个咩嘢人。

以文中情况为例，由于我哋好理解应征者想知清楚，所以福利嘅嘢我哋多数预咗你问，但如果你系咁针对住呢个话题（尤其系“啫”住其中一点），HR可能认为佢个人比较计较而扣印象分，值唔值得博？都系𠮶句：见仁见智。

（三）参观吓Pantry同厕所

有机会评估下环境，的确系一个了解公司情况嘅渠道，之不过Pantry o唔open同有冇“私人时间”系咪直接挂勾，大家可各自演绎。同时，相比起喺pantry，其实亦有唔少department钟意喺自己嘅势力范围建立零食国，闲时一班国民喺返自己疆土入面hea，呢啲未必可以一两眼望得出。

而厕所方面，作为参考同样并无不可，只系市面上唔少公司厕所系由大厦管理公司负责，千祈唔好怪错好人。

（四）唔好做低头族，周围望下员工嘅样

一般嚟讲，公司装修会议室多数喺Office最外围，一来唔想外人见到咁多嘢，二来唔想畀人见到啲失礼嘢，仲有啲三来四来等等未能一一尽录。如果咁好彩真系有机会入去，而且畀人押送𠮶时仲可以咁多时间CSI上身由员工至Mouse都验尸咁验，睇多眼当然冇蚀底。不过始终一间公司，上至老细、管理层、部门主管、同事团队；下至行业背景、部门背景等统统都会对环境作出影响。更多时候系每team每department都有自己生态，你见我系咁，未必隔离department都一样，如果单凭一眼之缘就一竹篙打一船人，未必系最佳决定。

－HR从业员的建议－

虽然上文指出一啲我个人唔认同原文嘅地方，但我相信诗宁小姐其实只系想带出留意身边事，见微知著嘅重要性，而本人对此系完全赞同嘅。同样地，我见工𠮶时亦都会留意啲枝枝节节，唔系话因为见到某啲嘢就要危险速逃，但作为参考，为间公司加下分减下分，应该有助你决定加唔加入佢哋：

（I）Reception部电视

小例子，虽然播得畀你睇一定系佢公司啲风光嘢，但如果出现好多好多员工活动／义工活动，你可能要有定心理准备有时啲星期六日要出动。

（II）会议室

会议室其实可以反映好多嘢，间房有几大、啲设备同櫈整唔整齐、会唔会攞咗嚟做杂物房、白板干唔干净、有冇啲Hi-Tech会议设施等等，绝对可以睇到间公司几有规模同埋愿意做几多门面嘢。如果有埋phone book仲开心，连个org chart都睇埋，大概已推敲到你个department有几多资源甚至你有冇机会升上去。

而且最重要系得你一个喺入面，除非佢系玻璃房，如果唔系反转嚟睇都仲得。

（III）面对team head

相比起老练（其实系麻本）嘅HR，同team head／line manager倾偈其实可以捞到更多油水。一来佢哋多数冇咁sensitive，二来佢哋真系身处你他日工作嘅环境，好多嘢比HR嚟得更实在。从佢哋讲嘢／问问题嘅角度（同样道理，如果佢系咁针对住某个话题，尤其系“啫”住其中一点），你大概都估计到实际嘅情况，以下系一啲例子同潜台词：

“依家份工忙唔忙，多唔多OT”＜＝ 你就好啦，我哋冇得咁悠㗎㖞

“你条Team都几多人㖞”＜＝我哋冇咁多资源，你最好有定心理准备要食自己

“你哋啲tasks都分得几清㖞”＜＝ 我哋10个窿6个盖，到时咩都要帮手

当然，写就咁写，但面试嘅环境、气氛、语调、用字甚至line manager有几醒目等等都可以影响实际意思，究竟佢发放紧啲乜嘢信息，只有靠你嘅直觉同经验去解读。最重要嘅系，你将来就系同呢位人兄共事，你最应该系谂下自己同佢夹唔夹得嚟，呢一样可以话系面试嘅重中之重。

基本上，每间公司／部门嘅文化同生态都好复杂，要喺咁短时间充份了解一间公司有几伏，机会其实唔算高，错误解读仲分分钟令你失去一份好工。不过我好信奉人揾工工揾人嘅精神，如果间公司嘅环境、同事、HR或老细畀你嘅印象唔好，与其为难自己，不如再揾份啱心水嘅。

小小分享，就此收笔，共勉之！

【编按：作者从事人力资源及培训多年，最爱与人面试交流。】

（本文为投稿，稿件可电邮至iwanttovoice@hk01.com；文章纯属作者意见，不代表香港01立场。）