【每逢大事讲故事】意大利公投 看今年第三只黑天鹅如何展开翅膀
成日有人话意大利公投系今年第三只黑天鹅，对于全球经济嘅影响，随时大镬过英国脱欧，大镬过特朗普做美国总统。你问飞云点解？因为𠮶五只欧猪，依然全部都系猪！经济搞唔掂，今次公投一旦过唔到，总理伦齐分分钟要执包袱走人，随时引发意大利版脱欧公投，你话大唔大镬喇？
2010年欧债危机爆发，总理贝鲁斯科尼（下称贝老）卷入嫖雏妓、贪污多单诉讼辞职（乘机拍下箩柚走左啰），呢几年政府换个不停，踢走个行紧缩政策嘅蒙蒂，换一个要大刀阔斧嘅后生仔伦齐上台，依家推动修宪公投，贝老居然呢个moment又杀出黎从中作梗。
讲意大利文，飞云净系识得Bunga-bunga呢个字，多得平时有睇新闻，贝老教嘅，urban dictionary都有架：
Erotic ritual which involves a powerful leader and several naked women.
After dinner we all had some bunga-bunga
讲贝老有啲咩政绩，在任总理合共9年，飞云真系咩都唔记得佢做过乜，净系记得……
旧事唔讲住，不过今次贝老出黎拉齐伦后腿，正正说明咗咩叫君子报仇十年未晚。话说贝老今年六月心脏有事，需要开胸做手术，医生都话佢死过翻生。你以为佢已经被打了败吗？你实在太睇少呢个80岁阿伯，虽然佢依家个朵臭到无可能重上意大利政坛顶峰，但其实由佢领导嘅意大利力量党（Forza Italia）仍然把持国会大量议席，握有12%意大利民众嘅支持，要左右大局亦有可能。
伦齐今次发动公投修宪，大家都形容为一场政治豪赌，押上嘅赌注就系自己嘅政治前途。顺带一提，佢只系41岁，做得贝老个孙啰。贝老爷大病初愈，本来好应该休养一下，点知公投前夕就走出黎反对修宪，同伦齐唱反调。
贝老话今次公投削减国会权力，会令国家走向“独裁”，仲话伦齐系大话精，“我觉得佢系共和国史上第一嘅大话精，仲叻过我。佢得𠮶40岁，系我岁数一半，佢仲有大把精力活力，四周围散播大话。”
死过翻生再插你一刀，呢个就系贝老!家阵民调显示，伦齐推动嘅公投，获通过机会危危乎，些微落后于反对阵营，贝老再走出嚟煽动下，随时搞到一大班温和派中间偏右嘅选民投反对，伦齐就真系系咁大。
贝老闹伦齐削减国会权力，系无错嘅，不过飞云就话：
话说2014年伦齐啱啱上台，贝老同意大利力量党其实都几撑佢，支持修宪缩减参议院规模及力量，不过2015年伦齐竟然将自己友推上总统呢个职位，拒绝推举原本两党都有共识嘅候选人。咁即系咩？即系起人飞脚，如果唔系喺政圈，真系要出江湖追~杀~令﹗
当然，贝鲁斯科尼嘅力量党就因此拒绝再同伦齐政府合作，亦不愿再推动政制及宪法公投。
虽然闹翻咗，不过其实唔少意大利政坛中人，都觉得伦齐系young版贝老，有贝老嘅前幕僚仲形容：“伦齐kind of似系贝老嘅仔。”唔单只身型，发型...吖唔系，系大幅减税，修改劳工法例等雇主更容易炒人，希望修宪加大总理权力，又赞普京啦。两个人嘅共通点，其实仲有一样──就系独裁本质，两位政治人物对于反对声音，都强横赶绝，郁啲就叫人收声，有佢讲无人讲。
至于两个人嘅分别，除咗年纪同头发，就系贝老想做但又做唔到嘅野，伦齐却实践到……
不过堂堂贝老㖞，咁样俾个o靓仔跣左一镬，唔嬲猪就假。所以今次公投过唔到，贝老实开心，因为佢又有机会重组新政府，捞番多啲政治本钱。
其实点解成日要将公投同辞职捆绑埋一齐呢？都系因为啲领导人太过任性同硬颈。
伦齐除咗有舖赌仔瘾，查实佢喺意大利政坛，不嬲出左名系冲动派，大家都知佢有个朵叫“拆卸王”，有咩旧政策，旧制度有唔啱，索性推倒重来。所以如果今次公投不获通过，佢已经重申咗N咁多次话要即刻辞职，唔肯听奥巴马讲继续留任过度政府总理，直至举行大选。
佢仲串串贡咁话“我无需要喺CV加多行”，公投输咗对佢no problem，只系意大利人将来少咗个选择。极右北方联盟（Northern League）同力量党已经表明公投唔通过，就会要伦齐落台，不过其他党派取态比较务实，怕政治动荡令经济更加危危乎。
经济学者兼前总理蒙蒂虽然反对修宪，但觉得即使公投输咗，伦齐都无需要辞职，希望佢可以继续留任。事实上从来亦冇规定齐伦输咗公投就要辞职，咦，呢个画面真系令飞云觉得熟口熟面......
但伦齐似乎仲系好硬颈，继续威胁话：“技术政府显然存在风险，但我不能避免，意大利人要投赞成票才能。”
伦齐呀，我够知你输左唔驶死，但飞云我已经责住成堆英镑蟹货喇，意大利公投如果过唔到，五星运动就有机会喺下年又再发动脱欧公投。唔系Brexit呀，系Itaxit呀，如果系真就影响成个欧盟，到时真系eat a shxt，影响嘅唔系意大利人自己啰。你赌咁大，有无理过我地感受呀？
无错，学黎明话斋，路系自己拣嘅！意大利人，你识DO啦?!
关于意大利公投的3条问题
意大利公投为了甚么？
改革内容是将参议院议员人数将从315人被削减至100人，议员亦不是直选入局，而是由政府从地区议会挑选。另外参议员不再具有审核政府预算和通过不信任案推翻政府的权力，不过就会有监督地方事务的权力；众议院则会实行两轮投票机制。去年有关建议获国会支持，630个议员中有360个赞成，但根据意大利法例，只有得到三份之二的支持才可以自动通过宪法，否则便需要公投；反对势力批评有关宪法改革不民主。
意大利公投为何值得关注？
意大利政局一向不稳定，自1945年以来有63届政府，因此各党派多年来都要求改革政制。但现时提出的改革已讨论多时，左右翼政党联合反对伦齐，就算他所属民主党内亦有反对声音，外界普遍认为，改革若遭否决，伦齐下台，将引发国会重选，造成政局不稳定；如五星运动等反对势力上台，更可能脱欧。
意大利公投还有甚么变数？
如前所述，未决定的选民可能会左右公投结果，投票率低也是另一个变数，过往不投票的人会否出来投票，也有很大影响。