【每逢大事讲故事】文在寅同金仔侵侵攻四方城 松章松出个未来
人品好，牌品自然好，可见麻雀台上真系可以悟出人际关系大道理。韩国总统文在寅今次同朝鲜领导人金正恩金仔嘅世纪峰会，如果同文在寅打牌，应该会几开心。
文在寅本身手牌真系差。首先，前朝政府同金仔关系见冰点，鬼咩？两代保守派总统，李明博当2000年签定嘅“南北共同宣言”系死嘅，朴槿惠仲想揾人去刺杀金仔，金仔理得你之前点“阳光政策”呀，梗系搅到你暴风雪，唔系点同死鬼爷爷同死鬼老豆交代！
加上东亚局势一直系个个都想插只手嘅议题。朝鲜半岛问题，明明就系南北两个政权嘅问题，唔知几时开始好似“保护环境”咁，变成“人人有责”，全因为“朝鲜半岛问题”中间多咗个字……唔系晌中间加个“助语词”呀，系个“核”字呀。
呢个“核”字，除咗代表“核武”，更反映呢个系半岛上嘅“核心”问题。好多人话朝鲜核问题始于上世纪90年代、朝鲜当时嘅领导人金正日发展核武，引发一连串国安同外交问题，但其实“核心”问题可以讲到更早年代……
喺盘古初开嘅年代……你以为飞云讲笑？唔系呀，认真㗎。据讲用嚟做核武嘅主要成份“铀”系史前已经存在；而朝鲜除咗人参多，另外就系多铀，因此朝鲜本身就有发展核武嘅优势。
呢个优势去到上世纪50年代朝鲜半岛分裂成南北两个政权后，起咗关键作用。朝鲜同前苏联合作研究核能，铺路发展核武。到90年代，朝鲜主动提出朝鲜半岛无核化，今时今日睇返简直好似科幻小说咁离奇。金正日话无核化？但系又系认真㗎，因为当时韩国都准备发展核武，加上美国喺韩国亦有部署，所以金正日就想嚟个先发制人。
当然，今日睇返转头，金正日有冇讲无核化都冇所谓喇，因为佢个囝囝金正恩已经威到，声称研发核武成功。但系金仔明白，“放手，放开所有，彼此更自由~ ”所以又话唔玩核武，让朝鲜半岛免除核战危机，真系多核谢晒呀！
有呢个历史背景，都明白文在寅夹喺朝鲜同国际中间，真系“难为了家嫂”。
不过正如香港民间特首刘华话斋：“愈烂嘅牌就愈要俾心机打。”文在寅打呢舖牌真系好俾心机。
金仔放弃核武，唔系懦夫，一方面系佢反正都已经证明咗自己嘅能力，唔怕你哋班友唔听佢支笛。另方面系，65岁嘅韩国总统文在寅对住后生佢近半、34岁嘅金仔，够晒忍辱负重。佢又哀又筛，先终于求得今日嘅两韩峰会。朝鲜同韩国嘅文化都系好传统嘅，所谓长幼有序，文在寅对金仔都咁忍让，难怪啲人都赞佢百忍成“金”。
文在寅真系坚忍过“大长今”！
文在寅上任总统唔够一年，朝鲜半岛局势就嚟咗个180度转变。你可以话佢好彩，撞啱金仔心情好让步；可以话系韩国好彩，因为保守派嘅朴槿惠“适时”爆出丑闻，造就亲朝的文在寅上场；亦可以话系文在寅有手段，氹掂金仔又拖得住特朗普。不过飞云系相信坚持就会成功嘅正面乐观好青年，就认为文在寅系胜在……
▲“我的字典里没有~ 放弃~ 因~ 为已~ 锁定你~”
文在寅因为家庭背景（佢嘅父母来自朝鲜咸镜）同政治背景（同佢亦师亦友嘅卢武铉积极推行对朝“阳光政策”），对朝鲜特别有情意结，旧年佢上场后，唔似前总统李明博同朴槿惠咁，对朝鲜问题视而不见、甚至采取强硬态度，反而立刻就对金仔伸出橄榄枝。
对于文在寅嘅热情，金仔最初“其实是拒绝的”。好似2017年下半年基本上文在寅都不断邀请朝鲜派队参加平昌冬奥、或者两韩组队参赛、或者两韩代表高举统一旗入场等等……总之就好似唐僧咁，成日喺度依……哦……
▲Only you~ Can 令半岛和平~
坦白讲，唔止朝鲜半岛，甚至地球嘅命运，都靠晒金仔㗎。但金仔始络系堂堂国家元首，“你不能叫我拍、就马上拍”，容乜易你之后“加了很多特技”，搞到我形象“动L”？
所以当时佢虽然冇答应，但亦冇直接拒绝，只系不时攞支导弹出嚟射下，试下文在寅嘅虚实。呢种态度维持咗约半年，2018年新年新开始，金仔终于踏出第一步。
金仔“打开口牌”，话有意参加平昌冬奥，一直就等紧金仔开口嘅文在寅，梗系即刻松章啦，要筒子、俾筒子，要索子、俾索子。朝鲜话只谈平昌冬奥安排，韩国就唔讲核危机；朝鲜先遣考察团访韩计划又话取消又要改期，就算冇解释韩国都收货；甚至为咗朝鲜有面子，韩国牺牲半队女子冰曲嚟同朝鲜组联队，美韩军演都叫停。松章松到出晒面，文在寅够诚意喇卦。
即刻睇下文在寅点松章俾金仔：
韩朝合组女子冰曲联队战冬奥 球员为和平牺牲 背后辛酸有谁怜？
【视角】停战64年韩国与朝鲜对话无门 金正恩不放文在寅在眼内？
之但系咁，文在寅高章之处，系佢唔止松章俾金仔，仲松埋俾对家美国总统特朗普侵侵。基本上呢舖牌，金仔要赢，侵侵唔想输，文在寅如果只顾同金仔打龙通，侵侵仲肯玩落去咩？所以文在寅亦适时出冲俾侵侵食一、两舖，例如虽然侵侵对金仔充满敌意，又话金仔系“火箭人”，又要同人battle个核武按钮，但文在寅竟然都赞侵侵促成韩朝对话功不可没，哗，真系死都俾你拗番生，高手！
文在寅咁委曲求存，左右逢迎，真系“难为了家嫂”啰。如果美国前总统奥巴马上任未够一年可以有诺贝尔和平奖，文在寅促成两韩对话、甚至美朝对话，更甚者可能真系会停战，核危机真系化解咗，咁佢都值得攞奖喇卦？
又如果朝鲜半岛真系停战，严格嚟讲侵侵同金仔都可以一齐攞奖，因为真系有资格讲停战其实系佢两个。咁边个最惨惨猪？咦？一台麻雀要四只脚，文在寅、金仔加埋侵侵都系三个人，数漏边个？咪就系冇人松章俾佢、冇人睇佢面色嘅日本首相安倍晋三啰。