【每逢大事讲故事】边个虾我囡囡？怪兽家长普京治国凑女用同一招
今年元旦，世界的苍井空老师结婚，飞云打击太大，每日宅喺屋企回顾同老师往日嘅温馨甜蜜片段。2月情人节仲要连住农历新年，情人节对单身狗已经系折磨，农历新年又有姨妈姑姐长辈们“关心”一下前途与钱途，飞云连番受创，一夜白发，连文都冇写。呢个世界就系咁，有人好似飞云N无咁失败，但有人就可以揽女兼变亿万富豪。边个财色兼收？咪就系刚刚连任俄罗斯总统普京个女婿沙马洛夫（Kirill Shamalov）。
点解要喺普京连任总统嘅日子讲普京个女？因为曾经有传言话普京有意培养佢呢个女成为接班人。虽然系传闻，但系本住中国人讲嘅“修身、齐家、治国、平天下”嘅态度，睇一睇普先生嘅育儿方针，或者可以从中领略一下佢治国嘅思维同格局……
呀，系讲故事前，飞云首先都要喺度，学习大大咁恭喜普京先：我真系恭喜你呀!
关于俄罗斯总统普京个女婿财色兼收呢个说法，飞云有几点要澄清番。首先准确啲嚟讲，沙马洛夫已经系普京个“前”女婿，因为今年1月佢已经同普京个女卡捷琳娜（Katerina Tikhonova）离婚。
咁系咪即系沙马洛夫收唔到色？梗系唔系啦，有传沙马洛夫同卡捷琳娜离婚，就系因为同俄罗斯索模沃尔科娃（Zhanna Volkova）有婚外情。睇睇相……
沙马洛夫同卡捷琳娜喺2013年结婚，当年佢哋嘅婚礼够晒威水。唔系好似香港个“千亿新抱”徐子淇当年果个7亿世纪梦幻婚礼，亦唔系好似韩国宋宋CP结婚时有豪华明星嘉宾坐阵，威水嘅系个婚礼使咗几多钱、有几多达官贵人到贺，咁多年嚟都系冇人知。
当然，稍为了解二人嘅身份背景，都可以想像到个场面。卡捷琳娜就唔使讲啦，佢老豆系普京㖞，俄罗斯过去18年、以及未来6年嘅总统吖嘛。卡捷琳娜自己亦好有才学，佢本身系一个科学家兼舞者，系莫斯科国立大学嘅高层。近年普京年纪开始大，外界都好关注佢继任人会系边位，有传普京就有意愿畀卡捷琳娜接班。总统个女、又可能会系未来总统，梗系好多人想趁机巴结吓啦。
睇多几个唔同角度：
至于沙马洛夫就系普京喺前苏联的“国家安全委员会”（简称KGB）任职时识落嘅老友尼古拉沙马洛夫（Nikolay Shamalov）嘅囝囝。1996年尼卡沙洛夫同普京，以及其余6人一齐创办咗Ozero Copperative，管理佢哋喺列宁格勒嘅物业。随住普京喺2000年登上俄罗斯总统宝座，亦带挈各位老友记，Ozero Copperative成为普京亲信圈子，各个成员成为巨企高层，或者系政府高官。尼古拉沙马洛夫系小型银行Rossiya Bank嘅股东，呢间银行而家亦成为俄罗斯最具影响力嘅银行之一。
等飞云带大家认识下普京Ozero啲#BFF先：
▲后嚟普京又识咗呢个friend。
咁嘅背景，可以想像有几多人仆到想去个婚礼。但二人2013年结婚，2015年先有少少报道讲婚礼嘅盛况。据知，当年二人喺圣彼得堡以北嘅伊戈拉滑雪渡假村举行婚礼，乘坐由3匹白马拉住嘅传统俄罗斯雪橇进场。新娘穿上长长嘅珍珠白婚纱，新郎就着深色长大衣，成个童话咁，但系咪公主同王子就……都系各花入各眼啫！
▲史力加同费安娜公主嘅故事就系教晓大家咪以貌取人。（真心）
沙马洛夫虽然都已经系富二代，但自从娶咗卡捷琳娜之后，身家扶摇直上。佢2008年26岁，就喺俄罗斯油气公司Sibur做高层，当时佢透过期权计划买入该公司4.3%股权；2013年2月佢同普京个女结婚，年半后就透过向Gazprombank融资，从普京另一个老友季姆琴科（Gennady Timchenko）手上大手收购Sibur嘅17%股权，合共就持有21%股权。
Gazprombank又系边个话事？当年系尼古拉沙马洛夫，而家就系佢另一个仔、沙马洛夫嘅哥哥尤拉沙马洛夫（Yuriy Shamalov）。即系老豆借钱俾个仔买个friend啲股权，一切都系围威喂。
之后2015年沙马洛夫睇中咗一个石化项目，Sibur就即刻收到政府17.5亿美元优惠息率融资。呢几年不断有公司睇中Sibur，中国国企中国石化都以13亿美元收购咗10%嘅Sibur股权。沙马洛夫嘅身家一大部份都系多得Sibur嘅贡献，福布斯估计截至2018年3月约有14亿美元。
国际调查记者同盟（ICIJ）去年发布嘅“天堂文件”（Paradise Papers）都有讲美国商务部长罗斯同沙马洛夫等人嘅关系：
【天堂文件】普京女婿是美商务部长罗斯大客 申报不清涉利益冲突
由买股到融资发展到售股等等，涉及多方全部系普京嘅人（当然除咗中国石化），咁你话从中变咗亿万富豪嘅沙马洛夫，娶咗普京个女有冇财运？直头可以话呢啲都系卡捷琳娜嘅嫁妆。
不过沙马洛夫最劲嘅系，佢竟然够胆离婚。同样都系“第一女婿”，美国嘅库什纳如果要同第一千金伊万卡离婚，顶多都系俾外父特朗普家族、特朗普集团封杀；但沙马洛夫同卡捷琳娜离婚就冇咁简单。虽然大家外父都系国家总统，但卡捷琳娜老豆系俄罗斯总统。
▲同样有个总统外父，库什纳就轻松得多。
如果普京只系喺内政外交等治国层面上面咁强势还好，至弊佢对家人嘅保护都一样咁强，亦都一样咁神秘莫测，治国同凑女都系“怪兽家长”！
唔记得普京点解系史上最强总统？睇下飞云旧作：
又或者睇睇相：
普京2000年成为俄罗斯总统，外界对佢嘅私生活可以话一无所知，除咗知道佢系男人，有个老婆。到后来先知原来佢仲有两个女，仲要系咩样做咩完全系唔知。关于卡捷琳娜系普京个女嘅事，2015年先有记者踢爆卡捷琳娜嘅身份，不过有关方面一直话唔知佢咁多个人资料。咁多年嚟先后有卡捷琳娜嘅同事同运动舞蹈相关人士确认佢系真‧第一千金，不过之后讲讲吓又反口话唔系，令件事更扑索迷离。
有报道话卡捷琳娜姓氏Tikhonova系自佢外婆，所以完全睇唔出同普京有关。据知佢1986年8月31日晌当时嘅东德出世，又据知佢系跳运动舞蹈。虽然网上流传佢跳舞嘅片，睇落佢个样都与普京有几分相似，但如果又有一日有人走出嚟话佢唔系普京个女，都唔需要惊讶，因为佢嘅一切都系咁神秘。
佢家姐就更加系神隐级，好似系大卡捷琳娜一年，好似系做医生，又好似搬咗去荷兰，佢老公好似系Gazprom高层。关于佢嘅报道有唔少，但始终只系停留喺“好似系”嘅阶段，确实资料欠奉，连相都只系疑似。对于两个囡，普京之系讲过一次话二人都喺俄罗斯生活。
▲睇下卡捷琳娜踢腿几有力，果然系普京个女，真系替沙马洛夫担心。
普京咁做最主要当然系护女心切，你睇佢点样保护卡捷琳娜嘅婚礼，就知道呢位爸爸系会好似香港啲怪兽家长，会打电话去个女间公司问人：“点解要我个囡囡OT？”
即系好似呢位港妈咁：
据当年喺渡假村打工嘅人讲，婚礼每个位都有保安人员，唔俾任何人接近个婚礼。有员工仲话：“我哋唔可以讲呢件事，我可能会俾人炒，你知道𠮶个系边个个女。”可惜外媒连呢句都登埋……
今年1月外媒爆出沙马洛夫同卡捷琳娜离婚，话沙马洛夫会被人分咗一半身家，但分咗一半都仲有7亿美元，然后仲可以同索模双宿双栖，咁仲唔系名符其实嘅“财色兼收”？
不过飞云就会奉劝想保住小命，就唔好学沙马洛夫咁玩法……