男友想读工程！港女忧变地盘佬“学坏”讲粗口嫖妓　观点震撼网民

“地盘烂仔文化黄赌毒乜都有，未来一定学坏。”有女生日前在讨论区发文大呻，指和男友明年考DSE，殊不知对方近日立志读工程，“但我真系好唔钟意地盘佬”，怕对方将来不用落手落脚一样会“好污糟”、“成身臭汗”，又怕男友会讲粗口及嫖妓，而且起薪可能只得2万多元，直言“职业点会唔分贵贱”，希望他找更体面工作。帖文引起热议，许多网民质疑她对建筑及工程界有刻板印象，“工程师同地盘佬好似有少少出入㖞大佬”，有人更直斥楼主的观点是在歧视地盘工人，引来一众工程系学生反击，劝她不如放过男友。

楼主在Dcard讨论区发文，直指“接受唔到男朋友想读工程”。她与男友将考下届DSE，备考之际男友称喜欢物理，“未来想做工程师，但我真系好唔钟意地盘佬，地盘烂仔文化黄赌毒乜都有，未来一定学坏”。楼主认为“工程佬”开工“就算唔使落手落脚做都好污糟，唔想人哋放工劲sweet咁去半岛食dinner，而佢成身臭汗咁约我”。

她又提到，从网上资讯得知工程师起薪很低，“得20k，唔系话要佢去做医生律师，但至少做份得体少少嘅工都好吖”。她已和男友讨论多次无果，而男友的预测分数不低，认为对方明明有其他选择，“真系好难接受佢做地盘，但大家都好爱大家，点做好？”

帖文令网民傻眼，质疑楼主对工程不甚了解，“工程师唔系做地盘，见到你个post我都唔知讲咩好”、“工程师跳个range好大，楼主嫌弃快啲放手啊”、“希望你唔好歧视做地盘嘅人，或者对佢哋带有一啲刻板嘅负面印象。仲有工程师唔一定系做地盘，同埋人工都可以好高”。

有人推测楼主应该明白两者分别，“唔系嘅，喺地盘做嘢都可以叫地盘佬㗎啦”，但她的言辞及对建筑业描述，令网民直斥“咁嘅眼界，畀你做到医生律师都冇X用、咁睇唔起人，做乜都无用”，提醒她不如先专心备考。

楼主后来补充指，“职业点会唔分贵贱，虽然讲出嚟好多人会闹我，但真心讲清洁工同医生畀人感觉都唔同啦，我其实唔系好care佢人工高低，系佢份工嘅工作文化问题，就算佢月入10万都好，都好难proud of佢”。

她重申，男友分数够入更好学科，而很多女网民都说男朋友从事工程行业后变坏，“真系好难接受未来有一日听到佢成口粗口咁同我倾偈，又或者跟咗唔知边个同事去叫鸡”，但坦言如果工程是对方梦想，一样会支持。

帖文引起大批工程系学生反弹，纷纷反击称“原来我要落地盘，我自己唔知嘅”，更批评楼主言语攻击所有建筑业人士，“讲到金融精英唔会黄赌毒，啲学生妹睇世界真有趣”、“𠮶啲好似玩得仲劲”。

有读建筑及土木工程的网民更爆粗回应，“我只可以讲，Ｘ你，到时出嚟做嘢人工够我一半再讲”，透露毕业4年月薪已达5.7万。另有工程系毕业生指，今年刚毕业起薪的确在2万出头，要“齐牌”才会人工大幅上升，“工程完全唔系话磨工龄hea就等上位嘅揾钱easy money”。

（Dcard）